Fayo cu printer na Elmar ta causa di tardansa di cuenta di awa di WEB

ORANJESTAD – Departamento di Servicio na Cliente di WEB e dianan aki a nota cu un cantidad di cliente di WEB mas grandi cu normal, ta yama of pasa na oficina di WEB na Balashi. A resulta cu nan ta haci esaki pa reclama di no a ricibi nan cuenta di awa di luna di februari di 2016. Un investigacion mas aleu a mustra cu esaki ta debi na un fayo den e proceso pa print e cuentanan cu tur luna ta tuma lugar na ELMAR. Entretanto WEB a inventarisa ken ta e clientenan concerni y ta informa cu lo hala e ultimo dia di pago pa e clientenan aki cu 1 siman dilanti te 15 di april 2016. 

LAMENTO DI WEB

Den un comunicado WEB ta informa di ta lamenta e susedido, principalmente pa motibo cu no ta den su man. ‘Nos ta compronde e inconveniencia di clientenan y cu no ta e prome biaha cu esaki ta sosode.’ WEB ta den contacto estrecho cu ELMAR pa determina kico ta e causa y con ta bay preveni esaki den futuro. Entretanto WEB ta pidi clientenan cu no a ricibi nan cuenta di awa di luna di februari pa tuma contacto via WEB su Call Center na telefon 525-4200 of via un email pa info@webaruba.com. Tambe por manda un mensahe personal via WEB Aruba su pagina di Facebook. Un otro opcion ta pa clientenan aplica pa mira nan saldo di cuenta online via WEB Care; por aplica pa WEB Care via www.webaruba.com. Ademas diasabra awor 9 di april oficina lo ta habri di 8-12 pa por paga y tambe hende por haci peticion via e   WEB ARUBA Facebook page