Porcentahe alarmante di negoshi no ta cumpli cu nan deber

ORANJESTAD - Tin un problema serio cerca companianan cu ta emplea hende na Aruba, particularmente esnan cu ta den necesidad di permiso, unda cu un percentahe preocupante no ta cumpli cu nan deber pa ley. Esaki ta encera entre otro pa registra nan trahadonan 'stranhero' cu ta nifica tambe perdida di placa den caha di gobierno. E siman aki SVB su director Edwin Jacobs a raporta cu den un periodo di 7 aña, gobierno a perde no menos di 3,25 miyon florin na entrada di fondo di malesa y accidente por ehempel. Den cuadro di esaki, tanto DIMAS y SVB hunto ta trahando pa remedia e situacion y por spera cambio pa mei caba segun directora di DIMAS Kathy Ruiz Paskel a splica NoticiaCla.com.

DISCREPANCIA ALARMANTE 

Segun Ruiz, e disrepancia entre DIMAS y SVB ta alarmante ora cu a haci e comparacion di nan datonan di labor for di 2008 pa 2013. Ruiz ta mustra cu den e periodo ey, DIMAS a duna 17.208 permiso di extension cu ta representa 6789 trahado. Di e grupo aki (maske cu DIMAS a duna nan un permiso di trabou), e personanan aki no tabata registra na SVB y no tabata' draag af' e sumanan corespondiente segun ley pa cada trahado. E percentahe di esnan cu no tabata sigura cerca SVB ta basta halto, un 24%. Esaki ta un total di 719 dunado di trabou. Di esakinan a nota cu 140 empresa di eseynan no ta registra na SVB como empresa. Esey a pone cu SVB ta haciendo nan parti pa 'schrijf aan' tur e dunado di trabounan aki pa e pagonan no realisa. "Ta papiando di basta placa cu SVB no a haya", Ruiz a sigui bisa. 

ACUERDO DI INTERCAMBIO

Den caso di DIMAS, e acuerdo di cooperacion cu SVB ta funcionando bon awor y kier cera un acuerdo cu departamento di impuesto a corto tiempo. "Pero pa loke ta SVB, nos ta sigui cu e acuerdo actual den sentido cu ta intercambia informacion riba base individual y periodicamente". Tambe Ruiz a mustra cu pa evita mas problema, DIMAS lo ahusta nan lista di rekisitonan entrante mei. 

KICO E CAMBIO TA NIFICA 

E cambio di rekisito lo nifica pa e doño di trabou, cu banda di e rekisitonan cu tin cu trece awor caba, e trahado mester somete un declaracion tambe unda cu ta mustra cu empresa y su persona ta registra na SVB. "Nos ta traha tanto pa baha e percentahe" Ruiz a sigui bisa. Loke cu e problema menciona ariba ta refleha segun e directora di DIMAS, ta cu no tur dunado di trabou ta cumpliendo cu nan debernan segun ley y como tal e fair share no ta cay pa gobierno manera debe ser.