OM: Niun sospecho concreto Arubiano den Panama Papers

ORANJESTAD - Ministerio Publico no ta conoci (ainda)  cu sospechonan concreto cu un interes Arubiano. Nan ta referi na e caso di Panama Papers y Aruba su posibel envolvimento. Asina su vocero Ann Angela a reacciona awe mainta pa NoticiaCla.com. Esey ta no obstante cu ta conoci cu tin tres cliente, varios compania y accionista di Aruba registra riba e documentonan internacional.  Segun Angela, " Ministerio Publico tambe a tuma nota di publicacion di e Panama Papers" Angela a sigui bisa. El a mustra tambe cu 'generalmente Ministerio Publico ta persigui casonan di labamento di placa'. 

CASO RECIEN BOU INVESTIGACION

Angela sinembargo ta menciona si cu 'recientemente a persigui un caso den cual a trata labamento di placa via un compañía Panameño'. " Belastingdienst ta den e caso aki, e departamento prome indica pa pone su mes na haltura di e significacion di Panama Papers. Si for di e investigacion di Belastingdienst sali sospechanan penal, anto Ministerio Publico lo sigui cu esey" e vocero a finalisa bisando. 

MINISTER BERMUDEZ

Si resulta cu clientenan Arubiano di e bufete di abogado Panameño Mossack Fonseca a sconde placa pa evadi impuesto, lo actua fuertemente contra nan door di departamento di impuesto. Asina minister di finanza Angel Bermudez a bisa partner di NoticiaCla.com, Caribisch Netwerk diaranson como reaccion riba e leak di e asina yama 'Panama Papers'.  

EVADI IMPUESTO

"Si en caso esaki sosode pa evadi pago di impuesto, lo actua fuerte contra e discubrimento di esaki a base di cobransa retroactivo y multa halto. Si ta necesario, lo tin persecusion penal tambe" e mandatario a sigui bisa.