Facebook a habri 'Facebook Live' pa tur hende entrante awe

PALO ALTO - Awe mainta e creador y doño di Facebook, Mark Zuckerberg a anuncia cu ta habri Facebook Live pa tur hende. "Awe nos ta lans'e pa tur hende, pa haci'e mas facil pa crea, comparti y descubri videonan live" Zuckerberg a anuncia riba su pagina. Te cu awor, mester a registra pa esaki specialmente. Y for di aña pasa solamente un grupo limita di persona tabatin aceso na e live video, particularmente artistanan y otro personanan di posicion halto.  

CAMERA DEN BO TELEFON

Live ta manera bo tin un camera di television den bo telefon. "Cualkier persona cu un telefon awor tin e poder di transmiti pa cualkier persona na mundo" Zuckerberg a bisa. E mes a bay live via su pagina awe mainta pa splica e detayenan y contesta pregunta di un grupo selecta.  

ARUBA 

Varios compania y persona na Aruba ya caba tin e facilidad aki, y ta uzando esaki durante eventonan special durante cual nan ta transmiti esaki en bibo.