Boneiro no ta interesa den referendum riba Ukraina awe

KRALENDIJK– Tres luna despues di e refendum riba e relacion cu Hulanda, Bonerianonan por acudi na e urna electoral atrobe awe. E biaha aki pa expresa nan mes riba e tratado di asociacion cu Nacionan Uni kier cera cu Ukraina pasobra hasta den Caribe Hulandes por haci esaki. Pero interes di e Boneriano, ta minimal. 

CIUDADANO UKRAINA

Esey ta e impresion tambe di Nataliya Bosma-Gurtova. E ta e unico ciudadano di Ukraina riba e isla. Na 2006 el a muda cu su casa pa Bonaire. Segun Bosma, e ta pro e tratado pasobra e kier mehoracion pa su pais di origen. E ta relata cu su famia completo ta biba eynan y ta pasando malo. E acuerdo ta pa fortifica e lasonan y tambe bin cu palabracion concreto riba derechonan humano y e atencion contra corupcion. E ta lamenta cu e campo di 'bisa no' ta ganando na Hulanda y ta teme cu su pais natal lo bira e victima di e sentimento anti-europeo cu ta existi. 

INFORMACION OBTENIBEL

Tur hende na Boneiro ta wordo referi na e portal Hulandes. No tin informacion riba e topico na papiamento. Partidonan politico apenas ta ocupa nan mes cu e informacion aki. Un partido te hasta a conseha pa no vota (partido PHU di Michiel Bijkerk). Robby Beukenboom (PDB) ta puntra su mes si un isla den Caribe mester expresa su mes pa casonan asina 'leu di cas'. 

Elvis Tjin Asjoe di MPB ta uni su mes na partidonan Hulandes CDA y D66 cu ta pro e tratado. Un total di11.798 persona riba Boneiro por eherce nan voto awe, pa cual tin 6 districto di e isla unda cu por vota. E hefe di hoofdstembureau Irma de Graaf a admiti cu e interes pa votamento ta poco. Ta predici cu esaki lo ta 30%. 

Pa Janita Monna  Caribish Netwerk. Foto di Nataliya Bosma tambe ta cortecia Janita Monna