Fenomenal Concierto di Jazz 'The Art of Music' na Cas di Cultura

ORANJESTAD - Riba dia 6 di april desde 8:00 p.m.  na Cas di Cultura Aruba lo presencia un concierto musical fenomenal bou guia di guitarista duo -tata y yui - Ivan & Serghio Jansen. Dos musico profesional den e ramo di musica jazz, fusion, clasico,  lo presenta un magno concierto di arte di musica cu artistanan local y internacional. E concierto ta priminti di ta un anochi di caliber halto crusando barera entre generonan di musica folkore y jazz contemporaneo. E Art of Music concert lo deleita pueblo di Aruba cu un variedad grandi den concepto di jazz harmonico conteporaneo. E programa lo ta dinamico, refrescante, y innovativo. 

Ivan Jansen ta conoci den nos comunidad, un maestro riba guitara y un pionero den combina elementonan di nos musica folklore cu harmonianan contemporaneo den e genero di jazz.  Su prome composicion den e concepto ey tabata na 1988, yama “Aruba”, un tumba jazz cu a resulta di ta un comienso di un “trademark” di Ivan como compositor y musico.  Ivan a participa den diferente festivalnan internacional, ultimamente na e grandioso Rochester Jazz Festival den  colaboracion musical cu artistanan internacional renombra, ganador di Grammy, manera Alex Brown, Oscar Stagnaro y Pernell Saturnino, y Alex Han.  Den presentación, fácilmente Ivan ta intercambia y domina e tecnicanan rekeri di guitara acoustico y electrico. Ivan a produci 5 CD, 2 clasico y 3 den genero di jazz. E ultimo produccion ta Horizonte Nobo cual tambe ta inclui e artistanan menciona. (ivanjansen.com)

Serghio Jansen, siguiendo e  pasonan di su tata a cultiva un amor pa musica y guitara,  innovando y kibrando barera entre genres musical. Serghio Jansen a gradua na aña 2011 for di Berklee College of Music mescos cu Ivan.  Ela presenta na jazz festivals na London y Asia y claro na Estados Unidos unda unda ela tour.  Serghio a presenta na e famoso Blue Note na New York. Serghio a desaroya su mesun estilo y identidad.  E ta conoci pa su solonan electrificante, cu melodianan emocionante y contando storianan epico cu su guitara alavez mustrando su dominio tecnico eleva. Su dominio den diferente metodonan experimental y artistico a haci Serghio desaroya un estilo autentico, cu ta dun'e e honor di ta un di e talentonan local mas sobresaliente den e ramo di musica aki.  Serghio a participa den varios produccion di CD cu artistanan internacional y local. (Serghio Jansen on Facebook)

Musiconan invita ta Reno Steba, tremendo bahista Arubiano biba na Hulanda pa hopi aña, kende a tour Europa cu artistanan grandi den jazz y a participa den varios festival den Europa.  Ela tuma clínica di e famoso Jaco Pastorius. E tabata director artístico pa un tempo di Izaline Calister. Reno tin produccion di CD y ta docente di academia di musica na Hulanda, y ta trahando ariba produccionnan nobo al momento. Un artista completo cu trayectoria hopi extenso. (renosteba/my space)

Randal Corsen, pianista & compositor renombra di hermana isla cu mescos cu Ivan a specialisa su mes den integra folklore y e herencia musical di Corsow den jazz.  Randal a produci varios CD y tambe a produci Izaline Calister pa un temporada y a haci varios produccion musical grandi.   Randal ta e ganador di e prestigioso Edison Award di Jazz na Hulanda.  (randalcorsen.com) 

E saxofonista Godwin Louis, basa na New York,  a gradua di eprestigioso Thelonious Monk Institute for Jazz Performance unda e la studia cu tur e personahenan mas grandi den jazz, manera Herbie Hancock, Danilo Perez, John Scofield, John Patitucci y mas. Ela tour extensamente y ta duna master clinics den su instrument.  Prome cu ela yega Aruba, ela presenta cu jazzista famoso Wynton Marsalis den concierto.(Godwinlouis.com)

E Divi Jazz Quartet bou liderasgo di Ivan cu ta presenta tur siman na Divi Resort consistiendo di Franklin Granadillo, tremendo trompetista, Richard Holmond, excelente baterista, y Roy Croes, excelente bahista, tur musiconan extraordinario, ta un parti esencial di e progama.  Divi Jazz Quartet tin mas cu 10 aña presentando exitosamente na Mulligans y Divi Resort y ta ricibi un acogido hopi grandi di nos bishitantenan di exterior.  

Michael Bremo, un joven cu ta un tremendo baterista recien gradua cu su Masters y actualmente residencia na Merca ta presentando na varios concierto y festivalnan den su region y tambe tin un trayectoria di festival y concierto ariba su nomber.

Lidrick Solognier, un hoben percusionista cu hopi talento y excelente tecnica, lo agrega na e presentacion cu su talento musical. 

Last but not least, Lily Rodgers, un cantante hoben artista extraordinario cu su voz sublime lo sorprende e audiencia cu su interpretacion y improvisacion.  Lily a traha den exterior pa varios aña y recientemente a bolbe Aruba. Nos por anticipa cu e publico por espera un anochi cu un arte di musica di alta calidad.