Parlamentario Besaril: Tin placa pa bureau minister, pero no pa KPA

ORANJESTAD – Tin placa pa bureau di Minister pero no pa Cuerpo policial. Ademas e parlamentario hoben di MEP kier indica cu gobierno actual ta promove cheap labor si analisa e presupuesto 2014. Por lo menos segun ex polis y awor parlamentario Guilfred Besaril. E parlamentario ta sigura cu Minister a confundi of tin un concepto eroneo di informacion cu e parlamentario di MEP a trece dilanti den su disertacion durante e tratamento di presupuesto recientemente. Besaril ta referi na e mocion cu e la presenta na al ocasion.

Segun Besaril, pa e fraccion geel, husticia ta di sumo importancia. “No tin placa na mundo pa garantisa e trankilidad y siguridad di un pueblo! Esaki tabata e esencia di nos mocion y mi desertacionnan”. E ex polis, awe parlamentario ta lamenta cu ni pa e Minister di Husticia mucho menos e Gabinete di Mike Eman, esaki tabata mes importante. “Na final esun cu a sali grandemente perhudica ta Pueblo di Aruba”.

“Durante mi di dos disertacion mi a enfatisa cu NIUN rato so mi acento tabata riba e trabou desplega door di e departamentonan di Recherche den KPA. Tampoco mi NO a elabora riba e stagiaires cu mester pasa nan pasantia den e departamentonan di recherche pa asina nan por termina nan estudio MBO. Loke SI mi a elabora riba dje ta, cu nos ta tratando di un organisacion cu a pasando den un cambio na 2011 y abase di e cambionan aki, e tin su necesidadnan urgente.

E parlamentario ta sigui mustra cu e parlamento ta duna un ehempel di cu si den pasado Cuerpo Policial tabata tin un formatie di 400 agente pa funciona optimal, awendia e formacion a aumenta cu por lo menos 600 agente. Pa por a yena e funcionnan nobo cu a bini na 2011, a saca un gran cantidad di hende for di diferente departamento existente, especialmente di polis uniforma. “Claramente mi enfoke tabata riba surveillance di polis. Motibo ta, cu esnan cu ta den uniform ta Pueblo su prome liña di defensa contra criminalidad.” Besaril a sigui bisa.

Loke segun Besaril ta algo cu a resalta durante su disertacion, ta e fenomeno "Cheap Labor" cu ta ser stimula indirectamente por medio di e Presupuesto 2014. Finalmente e parlamentario ta mustra cu ta trata di funcionnan den diferente rango den Cuerpo Policial. “Constantemente mester tin un flow di agentenan nobo pa keda yena un ke otro funcion operacional. Di e manera aki esnan di un rango mas abou cu tey caba den Polis, lo por bini na remarca pa bai un otro departamento y haña promocion cu nan merece. E ta ciclo continuo. “Pa es motibo aki, na momento cu bo dicidi pa corta den dicho ciclo, y no bini cu colleganan nobo pa cuminsa cu un klas di aspirante di polis, a lo largo bo ta perhudica e bon funcionamento di e organisacion. Ta Pueblo ta sinti e dolor di e mal decision aki” Besaril ta finalisa bisando.