Buscando solucion pa graf na Zeewijk cu ta alarmante

ORANJESTAD - Despues di ricibi critica riba e estado di santana na Zeewijk, departamento di salud (DESPA) a bay wak esaki. Ta trata di tanto esun di Gobierno como esun catolico. Segun un comunicado di e departamento, nan ta   buscando manera pa por soluciona e dilema aki, hunto cu partnernan envolvi. Jerry Staring, di e Management Team di DESPA a enfatisa cu nan ta haciendo un inspeccion hunto cu Departamento di Higiena y esunnan encarga cu mantencion di e santananan pa evalua e situacion.

ESTADO DEPLORABEL

Segun Staring, a haya aviso cu e situacion no ta mucho di gaba. Tabatin basta graf habri, basta graf cu weso saliendo, cu ta verval y tin masha hopi graf cu no sa di ken nan ta, di cua famia nan ta y no tin registracion. Mayoria di esakinan ta debi cu nan no ta data y/o ta di temponan hopi bieu , contrario na esnan cu ta mas nobo y ta conta cu un bon registracion. DESPA a nota, hunto cu departamento di higiena, cu e situacion ta alarmante. 

HIGIENA IMPORTANTE

Pa DESPA, e parti di higiena ta importante. Tin varios stakeholder cu ta envolvi den esaki y cu lo ta sintando cu otro pronto. Tin entre otro DOW, Censo, comisionnan di santana y tin cu traha hunto pa mira con ta bay resolve e problema aki. A haya varios graf, pa no bisa hopi graf, manera e personal di mantencion a indica, cu ta sin registra, di cual 300 di nan ta afgekeurd, cu ta forma un peliger no solamente pa higiena, pero pa hende mes. E estado di mantencion ta asina deplorabel cu hende por cay aden, como tambe heronan cu ta sali afo, cu por staca hende, entre otro.

BUSCANDO SOLUCION

Jerry Staring a splica cu esunnan envolvi tin cu sinta hunto pa mira con ta bay soluciona e problema di e grafnan mal manteni. E grafnan cu weso saliendo tin cu actua di biaha cu e departamento di higiena pa deshaci di nan. Pa loke ta e parti di higiena ta bin na prome luga cu tin cu percura pa e wesonan cu por a haya y pa deshaci di nan na un manera corecto.

PROBLEMA CU GRAF BIEU 

Departamento di Higiena a percura pa acumula e partinan cu a resta y pone nan den un graf comun, unda cu tin varios weso of partinan di e curpa cu no a desintegra ainda, hunto y nan ta purba di haya famia. Tur cos ta bay den deliberacion cu e comisionnan envolvi. Tin problema si cu no tin un registracion di varios graf, esey ta mas tanto grafnan hopi bieu. Esaki ta pasa na varios santana y ta un reto cu tin cu wordo soluciona hunto cu e otro parternan.