Whatsapp awor por ta codifica tur su mensahe entre usuarionan

WASHINGTON - Entrante awe e app di manda mensahe pornada, whatsapp, a actualisa su aplicacion pa codifica su mensahenan di tal forma cu solamente esnan cu ta manda y ricibi esaki lo por lesa nan. Esey ta haci e aplicacion aki hopi sigur y por genera asina mas trafico cybernetico cu e caracteristica 'nobo' aki. 

MENSAHE DI CODIFICACION

For di awe esnan cu tin e version mas actual di e aplicacion, ta ricibi un mensahe inicial pa cada persona cu nan ta manda mensahe. Esey ta indica cu ambos persona tin e versiona actualisa y cu nan ta 'safe'. Mientras cu te cu awe e tabata considera basta safe caba, potret y voz si ainda no por a wordo codifica. Awor tur voz, potret y cualkier forma di manda mensahe via whatsapp, ta codifica. 

USANDO TELEGRAM COMO ALTERNATIVA

Te cu awe, hopi hende tabata uza whatsapp pa manda mensahe pornada, pero pa cosnan mas 'secreto' of confidencial, tabata move pa e aplicacion practicamente similar cu ta 'telegram', un aplicacion Ruso cu mesun cualidad cu esun di whatsapp. Telegram tabata conoci cu e tambe tabata codifica. 

SETAR AFECTA PA USO DI WHATSAPP

Algun tempo atras, e director di Setar na Aruba Roland Croes a admiti durante nan presentacion comercial anual, cu enberdad whatsapp a afecta nan trafico di mensahe grandemente y lamentablemente no por haci nada contra esaki. Esey pasobra e trafico di mensahe regular (pa cual mester paga) practicamente no ta wordo uza mes mas. Pakico paga pa algo si bo por hay'e pornada. Como tal Setar a opta pa gana e placa perdi ey di otro forma cu otro alternativa.