Croes: Solucion temporal pa trahadonan di Aura Casino

ORANJESTAD - "Diamars atardi den un reunion hunto cu FTA, Mediador di Gobierno y representantenan di trahadornan di Aura Casino, Minister Paul Croes a informa e trahadornan cu a logra yega na un solucion temporal pa e trahadornan di Aura Casino. E trahadornan ta bay ricibi pago completo di nan Cessantia di parti di Sociale Verzekeringsbank (SVB), esaki di acuerdo cu nan derechonan legal.

SOLUCION TEMPORAL

Despues di varios siman di negociacion finalmente Gobierno ta logra un solucion temporal pa e trahadornan di Aura Casino. E proposicion aki a bin finalmente di parti di Mediador di Gobierno cu a manda e peticion na Conseho di Minister pa asina alivia e situacion pa e trahadornan. Minister di Labor a tuma contacto cu director di SVB pa sondea e posibilidadnan pa logra e pago aki, manera e mandatario a anuncia.

ALIVIA SITUACION

"Esaki ta un solucion temporal y ta alivia e situacion pa e trahadornan cu a pasa den un tempo duro. Diasabra SVB lo ta atendiendo tur e trahadornan pa asina yena nan peticion pa haya e Cessantia ,” asina Minister Paul Croes a informa e sindicato. "Ainda nos no ta cla pa yega na e solucion permanente pa e trahadornan, pero nos ta sigui traha riba esaki. Nos ta sigui busca e operador cu lo mester cumpli cu e trahadornan", Minister Paul Croes a declara. NOTA: Foto ta di archivo di NoticiaCla.com durante un reunion entre e minister y e trahadonan.