Proyecto Operacion Cunucu cu plan ambicioso pa sterilisa 500 cacho

ORANJESTAD - E proyecto conoci como como Operation Cunucu lo inicia e luna aki na Aruba, cu e meta pa resolve parti di e problema di cacho. A compronde cu como parti di e proyecto, un grupo di 12 tecnico y veterinario hunto cu 5 persona experiencia pa gara cacho, lo uza un sistema cu nan ta yama 'Mash Framework', pa logra e operacion. 

GARA 500 CACHO DI CAYA

E intencion ta pa den curso di 6 dia total, sterilisa un total di 500 cacho di caya. "Nos lo siña gruponan local con pa gara cachonan di caya di un forma humano, enfocando riba e aproximadamente 150 cachonan 'bibando' na dump y e cachonan di caya 'bibando' na San Nicolas, e grupo cu ta yama su mes 'Animal Balance' a bisa riba nan pagina di Facebook. 

ENTRENA GRUPONAN LOCAL

E grupo lo ta trahando hopi di cerca cu e team di 'United Dogs of Aruba', entrenando nan den tur aspecto di MASH pa asina nan por sigui replica e clinicanan den futuro. Intento pa comunica cu e grupo no a logra ainda.