Grafiti cu tema di pedofiel un biaha mas den centro di ciudad

ORANJESTAD - Un acto di vandalismo ta loke a keda desplega awe mainta den centro di ciudad. Personanan no conoci a pinta grafiti cu e tema di 'pedofiel' riba e murayanan di un scol, y tambe un di e cabaynan blauw. E tema ta uno cu ta data for di aña pasa ora cu tabatin un caso di pedofiel cu a bira conoci. Un aña pasa tambe tabatin algun acto asina ora cu personanan a dicidi di hala atencion pa e topico aki. Awe, e accion aki a ripiti. Mientras cu no ta conoci ken ta responsabel pa e actonan aki, ta notabel cu ta trata di hende cu ta buscando atencion riba e tema aki, y ta uzando areanan publico specifico pa mustra nan malcontento. Malcontento cu e caso lo no ta hayando e atencion necesario. Mientras cu e acto di pinta grafiti ta keda un acto di vandalismo, tin ta wak'e como un grito pa auxilio pa algo cu no ta hayando e atencion di otro forma. 

PUNTONAN STRATEGICO

Un di e puntonan strategico tabata riba murayanan di un scol na Playa (Maria College Mavo) y tambe un di e cabaynan blauw, specificamente esun dilanti edificio di Ministerio Publico. Ambos lugar ta lugarnan cu kier manda un mensahe. Pa e school, unda cu tin mucha ta bay, pa mustra e parti di hobennan cu ta bira victima di actonan di pedofiel, y na Ministerio Publico, posiblemente pa manda un mensahe pa actua contra e acto(nan) aki. Ta bisto cu ta 'bezig' ta acusando un persona specifico di un caso cu ta data di un aña pasa.