Deal of no cu CITGO na mei, CAft lo duna conseho na minister

CORECCION: Den articulo original a haci mencion cu CAft lo duna conseho na RMR (Rijks Minister Raad), pero esaki mester ta minister di finanza pa awor. 

ORANJESTAD - Kico cu pasa na mei awor, e colegio di supervision financiero Caft lo emiti nan conseho na minister di finanzas riba e situacion financiero (y presupuesto 2016) di pais Aruba. Esaki e colegio a confirma na NoticiaCla.com dialuna atardi. E hecho cu (gobierno) a pospone e deadline pa firma e 'definite participation agreement' cu CITGO y Valero pa 6 siman mas, no ta cambia nada. "No" tabata e contesta di Caft riba e pregunta ey. "Den mei CAft lo emiti su conseho riba e presupuesto 2016, manera a keda palabra" e colegio a sigui bisa. E palabracion entre CAft y gobierno, pues ta sigui normal na mei. 

DUNA GOBIERNO TEMPO PA DEAL CU CITGO

E pregunta a surgi mirando cu henter e intencion pa hala e reunion entre CAft y gobierno pa mei, tabata pa duna esnan ocupa cu e negociacion pa cera e deal cu CITGO na fin di maart ultimo. Un eventual deal lo a pone gobierno den un posicion positivo pa atende cu su situacion financiero den un miho forma. Mirando cu tabata den pleno negociacion na februari ainda ora cu CAft mester a emiti su conseho riba e presupuesto, (e colegio) a bay di acuerdo cu gobierno di Aruba pa pospone esaki te mei. CAft lo a bin bek na mei pa asina evalua e prome cuartal y mira con e deal cera cu CITGO e momento ey, lo a afecta e situacion financiero di pais Aruba. Gobierno a mustra CAft cu e deal ey lo por a soluciona tur problema financiero, incluyendo e buraco di 50 miyon florin. Y CAft a bay di acuerdo pa topa na mei. 

DEAL CU CITGO POSPONI

Sinembargo cos (atrobe) no a bay manera planea, cu a pone cu partidonan no a keda cla manera a keda splica siman pasa, cu a pone cu a pospone e firmamento cu 6 siman te 13 di mei. Y ta netamente na mei awor CAft ta bek na Aruba pa nan evaluacion palabra. E problema (segun e portal aki por a compronde) ta cu pa ora cu CAft bin bek, -mirando cu no tin deal ainda cu CITGO- , dificilmente gobierno por presenta un scenario financiero cu CITGO aden caba, pasobra simplemente 'no tin deal firma ainda'. E intencion tabata pa na mei e deal ta cera te cu por a presenta CAft un situacion financiero concreto, real, structura pa Aruba basa exclusivamente riba e deal aki. Si cera e deal awor na mei mes, no ta sigur cu por tin un plachi financiero realistico pa presenta na CAft como e solucion di gobierno. 

GOBIERNO MESTER TIN PLAN A,B OF C

Por corda di e ultimo bishita, cu CAft a alerta gobierno cu nan kier pa gobierno den e caso ey (ora cu CAft bolbe na mei) tin un plan B y C. Esaki en caso no keda cla cu e deal cu CITGO. Loke cu nan a planta como Plan B ta entre otro introduccion di un ABB (Algemene Bestedings Belasting), y plan C pa aumenta pa 1 juli e prima di BAZV cu 1of 2% mas. Esey ta algo cu realisticamente por sosode, segun CAFT y liher. E plan di ABB ta mas complica, pasobra mester pasa ley nobo siendo cu e otro ta un adaptacion. Kico cu pasa, CAft lo kier un plan riba mesa di gobierno di con nan tin pensa di soluciona e situacion. Y manera cu nan a bisa NoticiaCla.com biaha pasa y awe atrobe, kico cu pasa, e biaha aki nan ta duna nan conseho na minister di finanza. Nan no ta warda mas. 

LO DUNA CONSEHO NA MINISTER

CAft tabata hopi cla den su contesta na NoticiaCla.com :" Si e deal cu CITGO no ta cla e ora ey ainda of e efectonan financiero ainda no ta cla, CAft lo indica e riesgonan si, pero e lo no pospone su conseho", e contesta tabata.  Ademas como parti di e contesta, pues CAft a mustra cu nan lo no pospone nan encuentro cu minister di finanza y conseho di minister di Aruba. E "lo tuma luga durante e proximo bishita cu e miembronan di e Colegio ta haci na e paisnan". Como tal segun CAft, ' e palabracionnan cu CAft a haci, ta keda igual".

CONSEHO PA RMR

Pues no ta sigur ku CAft lo informa Conseho di Minister di Reino. E intencion ta pa CAft evalua e presupuesto i manda su conseho riba e presupuesto pa minister di finansa, manera ta e kaso normal. Ta solamente si for di e evaluashon sali ku e presupuesto no ta kumpli ku e normanan di LAft, òf si a resulta cu Aruba a hasi fiansanan nobo, e ora ei numa Cft lo informa Konseho di Minister di Reino. No direct, na prome instancia.