Fracccion di MEP pidi Ministerio Publico pa investiga minister Oduber

ORANJESTAD  - Parlamentarionan di MEP a acudi na Ministerio Publico pa pidi e organo aki pa investiga minister Otmar Oduber, relaciona cu e loke e partido ta considera 'papel cuestionabel cu minister Otmar Oduber a hunga den e asunto di Logo di Aruba y demas destahonan na companianan liga na su persona'. Segun e parlamentarionan, no solamente e informacionnan cu a wordo divulga recientemente durante e conferencia di prensa di minister Otmar Oduber, sino mas bien e defensa cu e minister a duna, tabata pa nan motibo pa bay Ministerio Publico. 

DEFENSA MALO DI ODUBER

Segun e parlamentarionan, e defensa di e minister a hinca e minister den mas problema ainda pasobra e ta contradeci su mes cada biaha mas. "Prome ta menciona cu un compania a gana e destaho di e logo, despues ta bisa cu ta un otro. Pa colmo, ningun di dos tabata existi na momento di e destaho, ta con nan por a gana e destaho e ora? Tambe tin e asunto di ken ta doño di e companianan: di e prome minister Otmar Oduber a bisa cu e tabata doño, hunto cu e señora di su miho amigo. E otro compania ta di su miho amigo, hunto cu señora di e miho amigo. Esaki ta indicacion directo di conflicto di interes" e fraccion ta sigui bisa. 

REACCION ODUBER

Segun e mandatario, su comentario breve tabata cu e ta un otro intento mas di e partido pa susha su nomber. Segun e mandatario a bisa NoticiaCla.com cu nan no a mustra un solo prueba y ta bon purba pues pa atacha su nomber. Y segun Oduber, no ta prome biaha cu esaki ta sosode.