Minister ta bandona demanda di difamacion contra periodista Andrade

ORANJESTAD - Minister Otmar Oduber no ta entama caso di difamacion mas contra periodista Nelson "Speed" Andrade. Esaki e mandatario a confirma na NoticiaCla.com dialuna atardi laat. Segun e mandatario, durante dia awe e periodista a 'cambia' su posicion compara cu siman pasa, cu ta pone cu 'logicamente no tin motibo (mas) pa bay corte (pa demanda Andrade)."Pero lo mi discuti'ele cu mi abogado" Oduber a finalisa bisando. E caso cu Oduber kier a entama ta pasobra siman pasa durante un conferencia di prensa, Andrade lo a acus'e di ta doño di e emisora Power FM. Y esey tabata suficiente pa Oduber rabia y demanda e periodista pa difamacion. 

CLA PA BAY CORTE SIMAN PASA

Siman pasa diabierna ainda e mandatario a duna su abogado Rudy Oomen e orden pa entama e caso, cu a cuminsa cu e proceso pa manda di un carta pa e periodista cu e orden pa rectifica esaki. Si e no rectifica, e demanda lo a wordo entama mesora. NoticiaCla.com a compronde cu e periodista lo no a haci tal. Sinembargo segun Oduber, awe den varios medionan di comunicacion, Andrade a cambia su declaracion unda cu e ta bisa cu e 'no a acusa e mandatario' di ta doño di e radio Power FM, sino mas bien cu ta 'puntra el a puntra' si Oduber no ta doño di e emisora. "E ora ey automaticamente el a  cambia su posicion, y logicamente no tin motibo pa bay corte" Oduber a bisa pues.