DOW: A pone e prome 50 meter di asfalt riba Green Corridor

ORANJESTAD - Despues di 5 aña di trabou di preparacion, porfin tabata asina leu cu awe mainta por a pone e prome capa di asfalt riba e fase di e 'Green Corridor'. Director di Dienst Openbare Werken, Marlon Croes a mustra cu loke a sosode awe mainta, ta cu a cuminsa cu e prome parti di asfalt unda cu lo pone 50 meter di asfalt pa test esaki. E intencion ta pa e proximo dianan cuminsando mayan, asfalta tur dia 500 meter di caminda te ora cu yega e crusada/rotonde di Pos Chiquito. Unabes cu yega e area aki, ta cuminsa traha riba e caminda existente.

MATERIAL SPECIAL

A mustra cu e director di e compania envolvi cu e proyecto, esta Carlos Zubieta di Odinsa, a splica cu ta uzando un material special diferente cu otro, cu ta sigura cu e asfalt ta di un calidad mas superior, uzando otro ingrediente. Segun Croes, Zubieta a informa cu a bin hendenan specialisa riba e tereno aki pa supervisa e trabounan aki, unda cu ta mix cierto tipo di material pa garantisa un miho productividad cu tin cu wanta pa por lo menos 18 aña.