Eman: Pakico yama green coridor 'green' pero ta uza asfalt pa trah'e

ORANJESTAD - E por zona un contradiccion ora cu ta papia di un coridor 'berde', mientras cu pa traha e coridor aki ta uza material 'no berde' pa complete. Awe mainta prome minister Mike Eman a purba clarifica e 'contradiccion' aki cu ta persigui'e pa basta tempo. Segun e splicacion duna pa e mandatario na ocasion di e prome parti di ponemento di asfalt riba e caminda awe mainta. E mandatario ta referi na 3 motibo cardinal pakico e y su colega Sevinger a opta pa yama e proyecto aki 'Green Corridor'. 

SPLICACION DI CONTRADICCION

Segun Eman, e ta compronde e contradiccion, ora cu ta papia di green pero ta uza asfalt pa traha e proyecto. Algo cu sigur no ta 'green'. E mandatario a splica cu mientras cu e plan tabata den lachi pa 20 aña, awor cu a sac'e, a adapta esaki y aki ta unda e 'green' ta bin aden. E plan 'original' tabata rekeri pa nan traha caminadanan den areanan cu lo a perde mucho mas lugarnan 'berde', y tambe lo tabatin perdida di hopi cunucu. Como tal a opta pa rediseña e caminda y pa amplia e caminda existente te na unda cu por, evitando e destruccion di e parti mas 'paden', cu tabata e plan original.

MAS MOTIBO

Tambe otro motibo duna ta pa no desaroya e bandanan banda di caminda y laga esaki manera cu e ta, esta mas berde posibel. Tabata posibel pa desaroya e bandanan pa crea mas entrada pa financia e caminda, pero a opta pa laga esaki mas intacto posibel. Y finalmente, entre caminda y e casnan cu tin, lo bay planta mas mata 'berde' pa asina percura pa e aspecto ey no bay mas perdi. Pues motibonan 'suficiente' segun Eman pa por yama esaki un 'coridor berde' aunke cu ta uzando material 'no berde' pa traha e coridor mes. 

CRITICA BANDA DI CAMINDA

Ora cu trabounan a cuminsa aña pasa riba e caminda cu tin cu bira 'Green Corridor', mester a destrui hopi mata y palo banda di caminda, y esey a bira un problema pa hopi. Te hasta tabatin un grupo di ambientalista cu a bin protesta un biaha contra destruccion di e area aki. Nan a protesta e tempo ey na altura di Sero Teishi, unda cu ta preparando pa e brug bin, cu ta causa pa destruccion di cierto areanan di Mangrove. Entre esnan cu a protesta, tabatin ruman di parlamentario di e partido berde.