Croes: Un caminda asfalta sin 'banchi' no ta un problema pa DOW

ORANJESTAD - Traha un caminda sin banchi, no ta un crimen ni nada for di e mundo aki. Director di Dienst Openbare Werken (DOW), Marlon Croes a atende e pregunta aki awe mainta na ocasion di e prome parti di asfalta pa e Green Corridor. Croes a splica cu e compania cu ta encarga, Odinsa, ta carga e responsabilidad pa e calidad di caminda. Y segun Croes, tanten cu e compania cumpli cu e specificacionan exigi di parti di DOW, no tin problema si e caminda tin banchi of no. De hecho, segun Croes, tin mas caminda na Aruba cu no tin banchi y cu si a funciona hopi bon. 

MATERIAL DIFERENTE

E intencion di e compania Odinsa, ta pa uza material otro cu normal cu ta garantisa cu e calidad di caminda ta keda mes bon cu un caminda cu tin banchi. E caminda cu banchi of no, tin cu cumpli cu cierto exigencia di DOW, pa e compania por haya su pago. Tanten cu nan ta cumpli, nan ta haya nan pago y den e caso ey, esaki ta e caso tambe. Manera a menciona den un articulo adhunto, ta uzando materialnan diferente cu expertonan riba e tereno cu a bin Aruba pa sigura cu e caminda y afsalt uza ta uno superior di tur otro. Esey ta nifica cu no mester di banchi. 

CAMINDA NA ARUBA SIN BANCHI

Pa clarifica e situacion mas ainda, Croes a haci mencion di varios caminda importante cu tin na Aruba cu pa mas di 25 aña ta traha, sin banchi, y cu ainda ta funciona perfectamente. Entre e camindanan menciona, tabatin esun na Rooi Afo. "Asina tin mucho mas caminda cu no tin banchi, pero cu ta funciona perfectamente" Croes a sigura NoticiaCla.com. E caminda mester por wanta por lo menos 18 aña di bida.