Discussion riba kico ta considera tereno berde, a continua den weekend

ORANJESTAD - Den fin di siman e discusion riba kico mester ta area 'berde' of no a sigui riba rednan social, particularmente Facebook. For di momento cu e departamento di gobierno DIP (Directie Infrastructuur & Planning) a clarifica cu e area dilanti Divi Phoenix hotel ta un area cu ta cay den e plan pa desaroyo turistico, y no ta un area berde, e organisacion no gubernamental Aruba Birdlife Conservation (ABC) a cuminsa un campaña pa purba haya clarificacion riba otro areanan cu lo mester ta 'berde' pero cu supuestamente segun un mapa presenta, no ta berde. 

SIGUIENTE AREA DI DISCUSION

E siguiente area di discusion a bira esun cerca di un proyecto hotelero (mira e potret principal di noticiacla.com  cu e articulo aki) cu ya caba ta construi, y cu tin un tereno banda di dje cu tambe lo ta pertenece na e grupo aki. Segun ABC, esaki si mester ta un area berde segun un mapa cu nan ta dispone di dje. Pa haya clarificacion, e fin di siman aki nan a haci un peticion publico dirigi na DIP, pa haya clarificacion pa wak ken tin rason den e caso aki. Claramente ilustra cu colornan diferente, y comparacion cu un potret di google, y un otro cu un mapa cu ta data di 2009 cu mester claramente identifica e areanan, kier sa kico ta kico pa evita mas malcomprondemento. Mientras cu e ta parce un 'guera' entre e presidente di e NGO, esta Greg Peterson contra instancia di gobierno, e ta sigura riba su pagina cu esaki 'no ta nada politico ni personal, sino mas bien un voz di esnan cu no por papia esta flora y fauna cu ta sufriendo bou di e maneho aki'.

DIP SU REACCION

Specificamente riba e topico aki ainda e departamento DIP no a reacciona ainda, pero loke si el a reacciona pa NoticiaCla.com recientemente, ta cu a haya orden di minister di e departamento (Benny Sevinger:red) pa cuminsa pa marca e areanan di un forma mas concreto pa evita mas discusion y division y confusion riba kico ta tereno berde y kico no. Como tal segun miembro di management team Isabel Dammers, a confirma cu a haya ordo pa awor bay marca tur e terenonan pa por facilmente sa kico ta kico. No ta conoci kico y con exactamente tin pensa di haci esaki. Den e siman cu ta bin, lo tin mas informacion riba e tema aki.