Hopi reaccion pa articulonan 'fictisio' relaciona cu 1 april

ORANJESTAD - Pa awor, mayoria (si no ta tur) lector di NoticiaCla.com por a compronde cu mayoria di e articulonan publica riba diabierna 1 di april, tabata consisti di un of otro chiste. Sea local of internacional. Mirando cu NoticiaCla.com ta mantene su mes na un nivel halto pa loke ta veracidad, confiabilidad y seriedad, tur su noticianan no por tin duda ariba. Pero, for di su comienso, riba un fecha di aña cu ta 1 april, dia internacional di haci chiste, NoticiaCla.com por permiti su mes pa 'los laga bay' y den cuadro di esaki presenta noticianan cu 'no ta berdad'. Un dia pa aña. Y e aña aki atrobe e portal a logra (husgando di e reaccion enorme) cu a logra atrobe pa entretene e lectornan tanto local como internacional. Danki pa e aceptacion di e chistenan.

DIFICIL PA DISTINGUI

Pa hopi lector, e articulonan a wordo asina hinca den otro cu practicamente no por a distingui si ta trata di berdad of un chiste, cu a haci e trabou ainda mas interesante. Pero nos mester ta honesto. Por lo menos 3 storia tabata completamente fabrica. For di nan, algun mesora por a nota algo cu no ta corecto, mientras cu otronan tabatin duda y te hasta a considera e storia aunke no berdad, un super bon idea. Pero tabatin uno cu ningun hende no a cay ariba cu ta un chiste, y te hasta a haya oferta pa yuda asisti cune. 

TERENO OTORGA PA DISNEY

E storia cu mas a haya atencion tabata esun unda cu 'gobierno lo a otorga tereno di free zone na waf na e compania Disney'. Mientras cu hopi a cay riba dje cu ta 'mucho bon pa ta berdad', e comentario general tabata 'pero e lo ta un bon idea si pa gobierno considera'. De hecho, a compronde cu gobierno a haya varios 'conseho' pa 'tuma e joke' aki na serio y purba logra haya e grupo di Disney pa haci algo semehante. Pero pa awor, e ta simplemente un chiste, unda cu ningun momento gobierno a otorga e tereno aki. Pa hopi como tal e lo keda 'wishfull thinking'. 

CHIP PA SEGURIDAD DI MUCHA

Un storia cu a wordo usa for di medio Hulandes, tabata esun cu lo a cuminsa chip muchanan cu un GPS den nan curpa pa evita cu nan por perde. Hopi a reacciona mesora den forma chistoso, otronan a considera e idea te hasta como diabolico y nada positivo. Otronan a haye un super bon idea pa implemente por ehempel den un grupo di persona cu mester wordo 'busca semper', of posibel prisoneronan. Finalmente, e storia no ta uno realistico, sino puramente inventa. 

ENTRENADOR DI CACHO CESAR MILAN NA ARUBA

E storia cu ningun hende a logra identifica como chiste of falso, tabata esun cu e entrenador renombra mundialmente di cacho Cesar Millan lo ta na caminda pa Aruba. E tabatin un impacto asina grandi cu te hasta agencianan grandi a yama y ofrece sponsorship pa e proyecto aki. E ta demonstra cu tin un interes grandi pa e persona aki bin Aruba. E ta den planning si, pero pa e aña aki, ainda e ta keda un 'deseo' y como tal e storia aki tambe tabata 'completamente fabrica' pa NoticiaCla.com. 

DANKI PA E INTERES

NoticiaCla.com kier a gradici pa e interes enorme cu e storianan aki a genera, y tambe pa e enorme reaccion cu esaki a genera, bon y malo. Nos ta un pais democratico cu ta acepta tur opinion, contal cu e ta den un forma respeta y sin vulgaridad y obscenidad y falta di moralidad. Te otro aña pa e siguiente edicion di 1 april jokes. For di awe atrobe, tur noticia cu e portal aki produci, ta 100% serio y confiabel.