Ter Horst: Directiva Parke Arikok a revoca varios asunto caba

ORANJESTAD - Directiva di Parke Arikok a revoca varios asunto awe 1 di april, cu lo a wordo implementa pa e ex director Emile ter Horst. Asina e ex director a reacciona awe riba su pagina di Facebook. "Asina straño cu mi a kere cu e tabata un chiste di 1 april" ter Horst ta bisa. Directiva di Parke Arikok tabata corto den nan reaccion pa NoticiaCla.com. "Mi lo mand'e (comentario haci pa ter Horst) pa e directiva y consehero legal" presidente di board Greg Peterson a bisa. "E directiva lo dicidi hunto si ta reacciona of no" Peterson a finalisa bisando. Pa loke ta ter Horst, e no kier a bay den mucho mas detayes na NoticiaCla.com diabierna, pero a confirma su pensamento cu el a pone riba facebook.

PROME REACCION

Considera como su prome reaccion publico desde cu el a wordo retira siman pasa 'per direct' segun un veredicto di hues, ter Horst a bisa cu e tabata hopi desapunta den un sentencia net prome cu fin di siman di pasco grandi. 

Di un banda e ta conoci cu un sentencia den un caso di trabou entre un director y un directiva semper ta previsibel, 'pasobra un hues no por manda e dunado di trabou cas pero semper e director. Pues tambe cumi" ter Horst ta bisa. E sa pasobra e ta casa cu un huez. 

INICIATIVA PARALISA

E ex director ta lamenta e asunto pasobra awor diripiente varios iniciativa ta para keto atrobe. Loke ta duel ter Horst mas ainda, ta cu 'e hues a kere tur e 'storianan' di directiva y ta parce cu no a ni lesa mi defensa'. Segun e ex director, e ta admiti cu e storianan di directiva ta simpel y bon hinca den otro, pero e hechonan ta seriamente bira y of un mentira. "Asina e hues ta kere p.e. cu mi ta responsabel pa fayonan di parti administrativo di pensioen siendo cu ta net ami a resolve e problema aki. "Mayoria di e fayonan tabata di prome cu mi tempo, y a cay completamente bou di responsabilidad di directiva". 

CASO CONTRA DIRECTIVA

E ex director mes tin un caso contra directiva riba e acusacionan contra dje, cu a wordo poni pa tratamento dia 31 di mei proximo. E ta lamenta e sentencia 'acelera' cu tin di haber completamente cu esun cu e ta bay trata fin di otro luna. 

REACCION DIRECTIVA

Mientras cu riba e comentario di awe e directiva tabata breve, mas den siman aki nan a bin dilanti cu nan prome reaccion publico riba e caso. Aki nan a mustra cu nan (directiva) ta lamenta cu den e periodo nos tras  ter Horst si tabata busca y drenta media continuamente pa trata na influencia opinion publico den su fabor y contra di directiva. " Na nos parecer e decision di hues ta papia pa su mes y ta muestra cu directiva tabata den su derecho na trata di termina e contract cu señor ter Horst" e presidente di e directiva Greg Peterson a bisa. Segun Peterson, a pesar di hopi peticion di prensa pa duna su banda di medaya mirando e publicidad negativo cu Arikok a bin ta hayando durante di e proceso aki e bestuur di Parke Nacional Arikok a opta pa laga e proceso cu tawata andando sigui su caminda y no duna comentario ariba e caso aki durante su tratamento. "Arikok ta satisfecho cu e veredicto cu ta un veredicto cu ta papia pa su mes. E focus di e bestuur di Arikok ta primeramente y ta keda pa sigura cu e parke ta wordo maneha corectamente y despues di e veredicto aki pa haya un manager nobo pa Arikok" Peterson a finalisa bisando na nomber di e directiva mas prome e siman aki.