Studiantenan rumbo pa Hulanda

ORANJESTAD - Tur dos grupo di e 248 studiantenan cu mester a biaha pa Hulanda, a bandona Aruba mientrastanto. Parti den dos grupo, nan a bula bay via Corsou y tambe via Boneiro y lo yega Hulanda 7'or y 10'or di Hulanda respectivamente. Unabes na Hulanda, nan lo wordo recohi pa e comision di bonbini cu lo transporta nan mesora pa nan respectivo ciudad unda cu nan lo haya un programa completo pa algun dia. Despues di esey, nan lo move pa nan respectivo ciudad y cas unda cu nan lo permanece pa e duracion di nan estudio. Esnan cu no a haya cas ainda, lo keda temporalmente den un hotel. Den combersacion cu e minister plenipotenciario na Hulanda, Alfonso Boekhoudt, e la sigura NoticiaCla cu tur cos ta cla y nan ta ancioso ta warda e gruponan aki ora cu nan yega Schiphol diaranson mainta. Riba e combinacion di foto por mira e grupo di studiantenan na momento di nan salida, pafo di aeropuerto Reina Beatrix, y despues paden den sala di salida.