Kock: 'Matutino a 'trek in' ontslag contra periodista 'Speed' Andrade'

ORANJESTAD - E matutino Diario a trek in e ontslag contra e periodista Nelson "Speed" Andrade. Abogado di Andrade David Kock a confirma esey pa NoticiaCla.com awe mainta. "Esey tabata nos exigencia, sino nos lo a cuminsa un kortgeding" Kock a bisa. Segun e abogado, e matutino a cumpli cu e peticion pero  'a schors e (Speed) cu pago di salario pa 'investiga' e asunto aki. "Nos no ta wak kico tin pa investiga, pero lo dunanan un paar di dia pa haci esey" Kock a sigui bisa. Si nan sigui despues, lo continua cu e caso contra e matutino. 

E CASO

Tabata siman pasa diaranson ora cu e periodista en cuestion tabata cuestiona e mandatario di turismo Otmar Oduber durante un conferencia di prensa, ora cu segun e matutino su director, e periodista no a sigui su orden (di para cu e preguntanan of e forma di haci e preguntanan). Basa riba esey, un dia despues e periodista a haya su retiro inmediato. E periodista a pone e caso den man di su abogado, cu a actua mesora y a haya e resultado menciona. E caso aki ta uno interesante mirando cu ta papia di posibel violacion di libertad di prensa vs subordinacion contra un superior di trabou, y cua ta pisa mas y of cua ta pisa mas den e caso aki. A busca contacto cu abogado di e contra partido, pero no tabata exitoso den esey ainda.