Despues di 51 aña e negoshi pa mucha Pinocchio a cera su porta

ORANJESTAD - E portanan di e tienda di co'i hunga pa mucha 'Pinocchio' a lanta cera awe, poniendo un fin na un historia di 51 aña. Gerente di e lugar Roberto 'Pepi' Oduber a confirma ayera na NoticiaCla.com cu tabata cu dolor na curason cu hunto cu su tata Horacio, a dicidi di pone un punto final na un bunita historia, pero cu no por a haci otro. Situacionan fastioso cu a confronta nan ultimo añanan a pone cu nan no por a haci otro cu cera e lugar. Comercialmente e simplemente no tabata duna mas pa tene e lugar cu pa tanto aña tabata e caso di co'i hunga pa muchanan na Aruba. E mesun centro pa mucha, awor a cay victima na temponan dificil den comercio den centro di ciudad.

MOTIBONAN PA E CIERRE

Segun Oduber, un di e ultimo puntonan (pero no esun principal) cu a pone e situacion empeora, ta introduccion di e parkeermeter aña pasa september. No kier culpa e introduccion di esaki ni cu ta contra, pero e realidad ta cu for di e momento di e introduccion a sinti e sla mas ainda. E patronchi di parkeer a cambia, a cuminsa blokea y uza areanan di parkeer cu a imposibilita nan clientenan pa parkeer. Ademas, e infrastructura cambia den e area, no a yuda na nada. Ta papia aki di e cambio haci rond di e.o. e construccion nobo di e edificio di husticia, e parke cu a crea den e area y e ceramento di cierto caminda. Tur a contribui na e caida den benta y trafico pa e negoshi, cu a pone cu finalmente mester a tuma e desicion duro pa cera e lugar. 

REALIDAD DURO

Un Horacio Oduber cu awa na wowo diahuebs tabata asisti su yiu Roberto despacha e ultimo clientenan, recordando e momentonan cu no por a kere a bira un realidad. Maneha un negoshi na Aruba no ta facil mas, y temponan dificil no ta yuda un comerciante bay dilanti. Berdad cu maneha un negoshi ta un riesgo cu ta cay pa responsabilidad di cada comerciante/ doño. Den e caso di Pinocchio, a dura un periodo largo unda cu e doñonan a purba salba loke por a salba, a inyecta placa ultimo pa percura pa un continiudad no obstante e temponan duro. Ironicamente e introduccion di e parkeermeter mester a genera mas trafico pa e negoshinan, pero den e caso aki e la traha 'contrario' y tabata e 'ultimo druppel'. Oduber a laga sa si cu e parti di negoshi cu ainda por core, ta esun di huur dino jump y stoel pa fiesta. "E ta un style di 'reborn' di Pinocchio den Pinocchio rental Aruba den huurmento di dino jump, tent, stoel y mesa. Esey si lo sigui por lo pronto", Roberto Oduber a sigura NoticiaCla.com. Pero Pinocchio si, su portanan a cera pa semper ayera.