Pronto por 'chip' mucha na Aruba cu 'Easy Chipper' pa propio seguridad

ORANJESTAD - Loke tabata falta na Aruba porfin ta bira un realidad. Hulanda den cooperacion cu gobierno di Aruba, a duna permiso pa importa e asina yama 'Easy Chipper', cu ta encera chip bo yiu(nan) pa asina nunca mas nan no 'perde'. E programa yama "Easy Chipper" cu ta traha cu e facilidad di 'Tag & Trace', uzando e asina yama 'tecnologia nano' cu ta uno super sofistica. E forma con esaki ta funciona, ta cu pa medio di un tipo di aparato, ta inyecta e chip den brasa di e mucha, despues di cual por sigui e pasonan di e mucha, sea via computer of bo smartphone. Cu esaki, nunca mas tin problema cu bo yiu por cana bay y perde, sigur no den un area popula manera un centro comercial of parke. Tambe pa siguridad na scol e ta hopi bon en caso algo pasa. E ta un invento cu ta procedente for di Hulanda, y cu finalmente luna pasa a keda aproba pa exterior. Mesora a haci e intento pa logra importa e aparato aki pa e.o. Aruba. Awe mainta a haya e aprobacion pa exportacion di e producto aki, mirando cu e ta cay den teritorio di salud. Tur aprobacion y permiso necesario a wordo duna y por spera e aparato aki pa otro luna caba na Aruba. E intencion ta pa cuminsa entrena personanan medico pa implementa esaki den un forma corecto, y set up lugarnan cu por haci esaki, bou supervision di expertonan cu lo bin for di Hulanda pa e prome luna. E costo no ta abou, cu ta e unico punto negativo di e aparato aki. A compronde cu un chip asina lo costa por lo menos 300 Euro.