Tereno ex Freezone otorga na Disney Resorts pa hotel y parke

ORANJESTAD - Conseho di Minister awe mainta lo ratifica e desicion pa otorga e tereno conoci antes como e area di FreeZone na waf na Playa, na e compania subsidiario di Walt Disney Company esta Disney Resorts cu na su turno lo traha un "Disney Paradise Pier" resort, acompaña pa un parke chikito pa diberticion. Mes momento e ta garantisa tambe cu e bapornan crucero di Disney lo uza esaki tambe como un di nan 'homeport' pa e region sur di Caribe. E siman aki ainda e director di Aruba Ports Authority, Jossy Figaroa a mustra cu trabounan pa limpia e tereno aki ta bayendo lento, pero awor tin un motibo pa acelera esaki. A compronde cu e intencion ta pa fin di aña pone e prome piedra di e resort, unabes cu e tramitenan huridico y financiero keda cla. Otro siman caba representantenan di e compania lo ta na Aruba pa sinta cu gobierno pa atende e detayenan final prome cu firma e deal oficial cu ta sigura un propiedad asina na Aruba. 

TIPO DI HOTEL

No ta conoci si e deal aki tabata prome cu e gobierno aki a sinta, ni si e ta bay ta un hotel tipo timeshare of transient, ni cuanto strea esaki lo ta. Un punto positivo ta cu e ta genera un trafico diferente y tipo di turista diferente cu Aruba conoce. Aparte di turista, Aruba tambe ta beneficia di entre otro e parke cu sigur lo beneficia muchanan cu no por biaha pa e parkenan regular di Disney na Merca.