Por cobra CITGO asina cu nan 'tuma control' di e refineria

ORANJESTAD - Asina cu e deal final cu e compania petrolero Mericano CITGO keda cera y cu nan 'tuma over',  gobierno di Aruba lo cuminsa cobra nan e lease. Asina e mandatario di energia Mike de Meza a confirma na NoticiaCla.com despues cu a haci e anuncio cu ta prolonga e deadline pa e acuerdo final. E diferencia ta si, segun de Meza, cu e cobransa lo ta proporcional, mirando cu lo dura por lo menos 1 aña y mey pa nan por 'start up' y 3 aña pa nan ta completamente operacional atrobe. Por compronde e ora cu unabes completamente cla, lo cuminsa cobra nan sumanan cu ta corespondiente na e 'lease agreement'. 

PAGO ASINA CU CUMINSA LEASE

Mirando cu e compania CITGO unabes gobierno di Aruba cera e deal cu nan, ta drenta un acuerdo di 'lease', e pregunta a surgi di na ki momento gobierno ta cuminsa haya parti di e placa cu tanto e tin mester di dje pa drecha su situacion financiero. Un di e preguntanan tabata cu mirando cu e refineria lo no ta operacional mesora ora cu CITGO firma, si ta husto pa cuminsa cobra nan e sumananan mensual of anual mesora, of ta warda nan ta operacional prome. Esaki pasobra manera cu e mandatario mes a informa diahuebs atardi, e inversion cu lo por tuma lugar ta di practicamente 1 biyon dollar. Y un compania normal tanten cu e no ta operacional, lo por haya un periodo di 'gracia' prome cu e cuminsa paga e lease. Pero den e caso aki, e mandatario a sigura cu asina cu firma, lo cuminsa cobra esaki, aunke no sumanan completo sino proporcional segun e acuerdo. Loke si ta stipula pues den e acuerdo segun e mandatario, ta cu gobierno tin e derecho di cobra sumanan mesora na e compania. 

EXTENSION DI DEADLINE 

Manera ta conoci, gobierno a anuncia diahuebs atardi cu a firma hunto cu CITGO y Valero pa extende e deadline pa un definite participation agreement te 13 di mei 2016. " Conhuntamente nos a yega na un acuerdo cu mester mas tempo pa caba cu tur cos. Tur tres partido ta positivo, para tras di e proyecto, pa por termina esaki den un termino relativo", minister Mike de Meza a anuncia. Ta spera cu por keda cla pa e ora bay e siguiente fase cu ta e fase transitorio unda cu CITGO ta tuma tur proceso over. Segun de Meza, e trabou inicial lo bira un rehabilitacion di e refineria, contrario na un asina yama turnaround. Lo dura por lo menos 3 aña pa e refineria ta den operacion. Prome 5 aña lo inverti 1 biyon dollar. E posponemento ta pa solamente keda cla cu e parti legal, pasobra segun de Meza, 90 % di e trabou ta cla caba. Keda pendiente pa mas informacion. Inicialmente e palabracion tabata pa keda cla awe, pero esey no a logra. Como tal a dicidi a firma e extencion manera anuncia ariba. E intencion ta pa firma e acuerdo final na mei, pa e ora CITGO tuma e refineria pa su operacion.