Elias: Presenta un concierto estilo Cuba na Corsou di Rolling Stones ta hopi dificil

WILLEMSTAD - 'M'a wordo confirma door di management y miembronan di e banda (Rolling Stones) cu nan a keda asobra cu e cos aki a coy un atencion asina grandi di henter prensa mundial'. Asina e filantropo di Corsou Gregory Elias a bisa NoticiaCla.com e siman aki relaciona cu e concierto siman pasa na Cuba. E reaccion di Cuba mes como pais tabata grandi. "E pueblo a reacciona riba un manera cu ningun hende no a experencia ainda. Ningun hende a kere cu e agrupacion aki lo a cay asina bunita y asina bon" Elias a sigui bisa. Mientras cu e efecto pa Cuba tabata grandi, pero e efecto pa Corsou ainda no por bisa mucho ariba. "Despues di añanan nos lo mira esaki". Manera ta conoci, Elias personalmente no ta gusta pensa riba su mes, den sentido cu si el a logra algo of no. "Mi ta kere ta un bon intencion, pero bo ta haci'e pa un idea filosofico cu mi tin. Y mi ta kere cu esey si a logra" Elias a sigui bisa. 

POSIBILIDAD PA CORSOU?

E combersacion rapidamente a move pa e posibilidad pa trece e grupo legendario (Rolling Stones) pa Corsou obviamente, y mas cu logico ta un di e estreanan pa Curacao North Sea Jazz Festival cu de hecho, ta un producto di Elias mes. Lamentablemente e posibilidadnan no ta mustra cu por lo pronto esaki lo por bira un realidad. Y esaki tin varios motibo segun Elias. "Si bo wak e organisacion y e produccion cu mi tabatin di buta eynan (Cuba), cu tur amor di mundo pa awe te aki 50 miyon aña, e podium so (caba) lo mi no por buta ningun caminda na Corsou" Elias a bisa. Como tal tin cu bay negosha cu e organisacion di Rolling Stones pa wak si nan ta acepta otro tipo di facilidad pa haci nan presentacion, cu no ta e stage cu nan ta uza. "Un forma mas modesto. Y no e aña aki mas pasobra nan ta cu vakantie. Posiblemente nan ta willing pa considera pa toca di un manera un 20 aña pasa ora cu nan a cuminsa bira famoso" Elias a bisa. "Y si por, logicamente e hendenan aki ta dunami un preferencia". 

LOGISTICA COMPLICA 

Elias, dunando ehempel di comparacion, a mustra kico mester haci pa por logra un show manera esun duna na Cuba. "Bo mester di trece poco (avion) 747 Corsou. Bo tin cu trece den haf di Corsou, sigur un 55 pa 60 container di 40 pia. Bo mester tin sigur 500 hende pa arma e podium. E podium su embergadura ta 80 pa 54 meter. Cu tur amor di mundo, mi no sa unda mi tin cu buta e podium mi so. Dus laga nos lubida esey pasobra nos no por acapara (esey)" Elias a sigui splica. Si  haci'e, ta haci'e riba uno cu tin na Corsou pa hopi aña durante CNSJ. "E hendenan aki tin un forma di trece un concepto riba e nivel di ColdPlay y U2 so bo ta yega e ora. Si bo haci'e na Corsou bo mester wak tambe pa bo por acapara tur e bishitantenan cu ta bin bo pais. Algo cu no por awo. Kiermen tur esey mester pens'e bon si nan dicidi di honra mi peticion cu mi a haci caba. Lo ta otro aña of aki un aña y mey" Elias a bisa. Pues e posibilidad t'ey. No imposibel, pero no facil tampoco, Elias a finalisa bisando riba e tema aki.