Doki di Discovery Kids na Teleshop San Nicolas

ORANJESTAD - Pasco Grandi atardi, grandi y chikito tabata na Paseo Herencia na unda nan a topa Doki di Discovery Kids. SETAR hunto cu Discovery Kids a trece Doki Aruba. Doki a haci su prome encuentro cu e publico di Aruba na e evento di Kids Easter Sunday na Paseo Herencia. Aki muchanan tabatin oportunidad di saca potret cu Doki y tambe participa pa gana un Fiesta di Cumpleaños di Doki.  Durante Doki su presentacion por a haya un flyer cu mayornan por a yena cu informacion di e mucha cu kier a participa. Muchanan di edad di te cu 9 aña por participa. E promer ganador di su fiesta a keda anuncia diadomingo na Paseo Herencia. Esaki a keda den nomber di Aranza Trimon, cu ta cumpliendo 3 aña na luna di october proximo. Y ya ela gana su fiesta di cumpleaños.  

E premio di un fiesta pa e mucha ta inclui: Un bolo di Doki, 25 cupcakes di Doki, paki blaas di Discovery Kids, 25 caarchi Invitacion di Doki, 25 croquette, 25 pastechi, 25 dedito di hotdog, 1 Piñata di Doki  y un Treatbag cu Juice, chips, Cornflakes. 

Doki lo bay bishita diferente SETAR Teleshop durante e siman aki. Aki mayornan por bin tambe pa topa y cuminda Doki, saca potret y yena e flyer pa por participa na un sorteo pa gana un fiesta di Doki. Ta limita na un flyer pa persona y Doki lo reparti esaki solamente ora e bezig cu su “Meet & Greet”.  E flyer lo bay den tombola pa participa den e rifa den cual 2 mucha mas por gana un fiesta di mucha.  

Te cu awor Doki a bay Paseo Herencia, SETAR Store y proximamente lo e t'ey dia 2 di april 2016: Teleshop San Nicolas entre 3:30 pm – 5:30 pm.  

Doki ta un serie di television pa mucha cu ta pasa na e canalnan di Discovery Kids (67 y 330 HD). Doki ta un cacho den cartoon cu ta e heroe principal y protagonista den tur e storianan. E ta valiente, optimista y curioso y semper e ta cla pa cuminsa un Aventura nobo of biahe. Doki y su amigonan — Gabi, Fico, Anabella, Oto, y Mundi — ta miembronan di e Worldwide Expedition Club, un organisacion dedica na explora, discubri y siña. Hunto nan ta biaha rond di mundo confrontando loke ta desconoci pa nan, explorando paisnan distante y culturanan exotico mientras nan ta resolve problemanan, conoce amigonan nobo na caminda y mas importante ta cu nan ta siña di confia den nan mes y otronan mientras nan ta uzando nan gran imaginacion. Discovery Kids ta inclui den e pakete Basico di Cable Digital.