Luna di Colecta Anual di Koningin Wilhelmina Fonds ta cuminsa diabierna

ORANJESTAD - Tur aña Koningin Wilhelmina Fonds Aruba ta tene cu colecta anual den luna di april y e aña aki lo no ta un excepcion. Segun Lelicia Tromp kende ta e vocero di e fundacion, e  fundacion no ta haya subsidio di gobierno ni di otro instancia local of internacional y pa e motibo aki ta organisa e colecta tur aña. A base di e entrada di e colecta y di e donacionnan cu e fundacion ta ricibi di comunidad durante henter aña, ta haci tur e trabounan pa brinda sosten y ayudo na e pashent di cancer y su famia.

COLECTA

E aña aki lo tene e colecta un biaha mas y esaki lo cuminsa diabierna awor dia 1 di april. Durante e fin di simannan di dia 2, 9, 16, 23 y 30 di april lo por topa cu e boluntarionan na diferente localidad tur rond di Aruba, manera na pompstations, supermercadonan, rotondenan, luznan di trafico y diferente otro lugar mas. Por reconoce un collectant na su schort cora y e collectebus shinishi cu e seyo di Koningin Wilhelmina Fonds Aruba. Si bo ta desea di duna bo aporte y yuda recauda fondo sea ta bo so of den un grupo, bo por tuma contacto cu Koningin Wilhelmina Fonds Aruba na 5820412 durante orario di oficina of pasa na nos oficina na Spinozastraat 9 net patras di Watertoren na Playa. Aki lo splicabo kico mester haci pa asina por colecta den nomber di Koningin Wilhelmina Fonds Aruba na e forma corecto. Si bo ta desea mas informacion, por bishita nos website www.koninginwilhelminafonds.com y tambe nos pagina di facebook Koningin Wilhelmina Fonds Aruba.

SERVICIO NA COMUNIDAD

Koningin Wilhelmina Fonds ta brinda comunidad diferente servicio y ta enfoca hopi riba e aspecto di prevencion, informa y educa. Servicionan ta inclui e.o. cuido na cas, guia di e pashent y su famia durante e enfermedad y duna e pashent prothese y bh unabes cu el a opera su pecho. Tambe ta yuda e famia na momento cu manda e ser keri den exterior pa tratamento ya cu ta duna e di dos acompañante un pasashi gratis pa asina e por compaña e pashent na e momento cu mas e mester di e compania y sosten.