Fraccion MEP cu lista di pregunta pa minister Oduber riba logo Aruba, radio y ATA

ORANJESTAD - Den un carta dirigi na presidente di parlamento Marisol Lopez Tromp, fraccion di MEP (partido di oposicion) a manda un lista di 25 pregunta pa minister Otmar Oduber contesta, riba e asunto di e.o. ATA, su relacion cu varios compania, su participacion cu un radio emisora, fondonan uza pa esaki y mucho mas. Hunto cu esaki, miembro di e fraccion geel, Dangui Oduber a referi na esaki tambe durante di un conferencia di prensa di e partido diaranson. 

PUNTONAN DEN CARTA

Puntonan den e carta y tambe di (Dangui) Oduber ta entre otro e asunto di e companianan Graphix & Beyond y Damox, y nan relacion cu e mandatario. Ta indica cu e mandatario lo no ta papiando berdad riba su relacion of no cu e companianan aki. Ademas e fraccion geel ta referi na varios contradiccion, cu no ta consistente cu e declaracionan di (Otmar) Oduber. E asunto di bannernan produci pa e companianan di amigo di (Otmar) Oduber, esta Ralph Maduro tambe ta wordo cuestiona den e carta cu pregunta y e reclamo di (Dangui) Oduber. Finalmente e carta ta pidi pa produci e 'afschriften' di Centraal Accountants Dienst riba e parti financiero di Aruba Tourism Authority pa haya claridad riba e parti financiero cuestionabel segun e fraccion geel. (Otmar) Oduber a mustra recientemente cu tin suficiente cifra y documento cu ta mustra claridad, pero e fraccion ta mustra sinembargo cu e cifranan aki no ta 'specifica' y como tal kier mas claridad. Lesa e carta di pregunta aki.