Loke firma diahuebs no ta 'definite agreement' ainda

ORANJESTAD - Lo no tin firmamento di e 'definite participation agreement' entre gobierno di Aruba y CITGO diahuebs. Esey a keda confirma pa e mandatario encarga cu e negociacion pa gobierno di Aruba, Mike de Meza na NoticiaCla.com diaranson atardi. Di otro banda, e mandatario a confirma si cu 'lo firma algo'. Pero e no ta e documento final, esta cu ta bisa cu CITGO ta bay di acuerdo definitivamente. Loke ta bay firma ta un documento cu ta determina 'unda partidonan ta, kico falta y kico ta loke a logra te awo'. Pa e mandatario, esey ta positivo caba si. Na e momento cu e mandatario a papia cu NoticiaCla.com, ainda partidonan tabata den combersacion diaranson atardi pa anochi y lo continua ainda diahuebs den dia. Pero pa por firma e 'definite participation agreement', lo dura por lo menos algun siman mas segun e mandatario a confirma na e portal aki. Ela confirma cu tabata e intencion pa firma esaki diahuebs awor mas tarda, pero ta admiti cu tabata enberdad 'mas complica cu a kere'. 

POSITIVO CU TA DRENTA DEN E FASE FINAL

E intencion ta pa a continua reunion diaranson anochi, diahuebs den dia y na final partidonan firma un documento cu tin cu delinea e proximo fase. E mandatario ta positivo den sentido cu esey ta nifica cu ta sigui dilanti y ta drenta den e siguiente fase. E fase ey ta e fase di aprobacion. Pero mes momento ta admiti cu 'tin basta cos pa caba ainda'. E mandatario a mustra cu contrario na pasado ora cu companianan tabata meramente traspasa accion di un compania pa otro, esaki ta un otro asunto. Aki Valero lo stop di existi y ta pasa pa un compania nobo cu ta di gobierno. E detayenan tur mester wordo regla y aproba tambe. 

TA SIGUI E PROCESO DI APROBACION DI TUR PARTIDO ENVOLVI

Unabes cu firma e documentonan diahuebs, lo pone riba papel 'unda nos ta y ta duna otro confiansa'. "Nos lo ta ratificando loke a wordo haci te awor" de Meza a bisa. Mes momento a bisa cu si firma e 'definite participation agreement' mes, ta sigui un proceso di aprobacion. Esaki ta nifica cu pa Aruba, parlamento tin cu aproba e deal cu a wordo cera. Como tal, e ta un acuerdo 'bou di condicion' esta 'under provision' pendiente e aprobacion necesario. Mes momento, CITGO y Valero na nan turno tambe mester di aprobacion di nan respectivo directivanan prome cu tur cos por bira final. "Den e fase ey nos ta bay drenta awor", e mandatario a bisa finalmente.