Abogado a inicia tramite pa demanda 'Speed' den corte

ORANJESTAD - Abogado di minister Otmar Oduber a inicia tramite pa entama caso contra periodista Nelson 'Speed' Andrade, y ta buscando mes momento daño di perhuicio si e periodista no rectifica su acusacion contra e mandatario. Asina e mandatario a confirma na NoticiaCla.com diaranson merdia. "E acusacionan cu e periodista a haci ta totalmente falso. Mi por prueb'e cu documentonan" Oduber a bisa, desmintiendo atrobe cu e lo ta propietario di e emisora Power FM. E acusacion aki a wordo haci durante un conferencia di prensa siman pasa diaranson pa e periodista en cuestion, cual no a cay den bon tera cerca e mandatario. Como tal e mandatario a exigi pa e 'tuma su palabra bek', pero e periodista a opta pa no haci tal, causando cu e mandatario a anuncia e caso contra e periodista. 

HALA ATRAS?

Pero e siman aki tabatin indicacion cu e mandatario lo a hala atras, y cu e caso lo no a wordo entama mas. Pero diamars anochi e mandatario a bisa cu e ta den tramite y cu durante un reunion cu su abogado diaranson mainta lo por a duna mas comentario. Despues di e reunion ey, e mandatario a confirma cu e caso lo wordo entama y cu e abogado a haya orden pa entama esaki. E foto ta di archivo di e conferencia di prensa unda cu Oduber a anuncia e caso contra e periodista.