Fiscal Rip ta pidi castigo di bida largo pa Elvis “Monster” Kuwas

WILLEMSTAD – Caso Magnus a continua diamars mainta na Corsou, unda cu tanto fiscal Rip como abogado di sospechoso Kuwas a hiba palabra. Durante e rekisitorio di e fiscal, e la pidi castigo di bida largo pa Kuwas, acusando e di 3 diferente morto, y entre nan esun di Helmin Wiels. A sigui e abogado di Kuwas, mr Saleh, cu a mustra na varios instancia cu e caso no a wordo trata corectamente, y cu te hasta Recherche Samenwerkings Team (RST) lo a paga na tur, un suma di 19 mil florin na casa di Kuwas. RST ta desmenti esaki segun fiscal, argumentando cu ta trata di un suma cu ta parti di e gasto pa proteccion pa e testigonan. Saleh no a bay riba e hechosnan mes sino mas bien e aspecto technico di e caso, atendiendo loke pa e abogado, ta puntonan cu a bay robes y cu ta pone cu su cliente mester sali liber. Hues van Dam a suspende e caso pa almuerzo y a pone cu ta sigui cu esaki despues di merdia. Rumam di Helmin Wiels, Aubert Wiels a bolbe considera e caso como uno dificil pa sigui, debi na e emocion cu esaki ta trece pa e y su famia. Tambe e no ta considera Kuwas como un persona pasobra e no tin gevoel pa cu e caso. “Si e pidi pordon, e lo haye. Pero mi no ta kere cu e ta pidi pordon. Ni su mama e lo no pidi esey” Wiels a laga sa di Kuwas. foto di Kuwas ta cortesia corant vigilante.