Tin confiansa den politica local, hopi balor pa Hulanda

LEIDEN – Habitantenan di e partinan Caribense di Reino ta haña cu nan isla tin hopi necesidad di e sosten y supervision di Hulanda. Pero e actitud di Den Haag contra e islanan mester cambia lihe. Esaki ta e conclusion di cientifico Wouter Veenendaal despues di un investigacion di opinion amplio riba e islanan.

KITLV

Anteriormente KITLV a publica un cantidad di cifra di e sondeo di opinion pa cada isla. Despues di lunanan largo di investigacion e rapport final ta cla y eyden ta compara e resultadonan di e investigacionnan y islanan cu otro. Habitantenan di e partinan Caribense di Reino ta sinti nan mes neglisha pa Hulanda: nan tin un sentimento fuerte cu na Hulanda no tin suficiente conocemento tokante e islanan y cu tin poco respet pa cultura Antiano.

For di e investigacion a sali cu habitantenan di e islanan ta duna Hulanda hopi balor. Por ehempel pa tin un pasaporte Hulandes, proteccion militar y sosten Hulandes pa combati criminalidad internacional.

Mas of menos tres kwart di e habitantenan di e partinan Caribense di Reino ta contento cu Hulanda ta supervisa e gobierno y e finansanan di gobierno. Esaki ta conta tambe pa e paisnan autonomo Aruba y Corsou. Tambe e sosten financiero for di Hulanda 80 porciento ta haña ‘necesario’ te ‘masha necesario’. Mas o menos 90 porciento ta haña importante cu nan yiunan ta siña Hulandes na scol.

MINISTERIO

E científiconan di e instituto diamars a presenta e resultadonan di e investigacion na e funcionarionan publico di ministerio di Asuntunan Interior y  Relacionnan den Reino. No tin recomendacion den e rapport final di e sondeo di opinion. “Nos no ta bai tuma e luga di esnan cu ta traha e maneho”, segun Veenendaal. “Nos ta spera cu ministerio y e politiconan di Den Haag lo lesa e resultadonan bon y kisas a base di esaki, adapta e maneho di e islanan.”

POLITICA LOCAL

Esnan cu a responde no solamente ta critica e actitud di Den Haag, sino e politico local tambe. “Bon mira riba tur isla ta husga negativamente tocante e confiabilidad di politiconan propio y cuanto e propio politico ta representa e interesnan di pueblo.”

ARUBIANO MENOS NEGATIVO 

Arubiano y Sabano ta menos negativo di tur isla, mientras cu Curasoleñonan ta esnan mas negativo tocante nan mes politiconan. Especialmente e caso den corte contra ex prome minister Gerrit Schotte y e asesinato di Helmin Wiels lo tabatin gran impacto riba e confiansa den politica local, Veenendaal ta conclui. “E instabilidat politico na Corsou tampoco no ta bon pa e confiansa.”

SONDEO DI OPINION

E instituto cabamento di 2015 riba tur isla a puntra e habitantenan nan opinion tocante politica y gobernacion den Reino y e relacion cu Hulanda. E entrevistanan tabata personal, cu lista di pregunta. E cifranan di Sint Maarten no t’ey pa motibo di supuesto fraude cu e datonan di encuestado local. E rapport final cu un analisis extensivo di lista di cifra pronto por download via e website di KITLV.

 Autor John Samson Ret Karibense