Denz: Debi na exito di aña pasa, ATA a aumenta sosten pa AMF 2016

ORANJESTAD - Mirando cu e meta a wordo logra y surpasa den e prome Aruba Music Summer Festival na 2015, Aruba Tourism Authority a bay di acuerdo pa bolbe inverti den e festival e aña aki. Durante e conferencia di prensa diamars pa anuncia e line up oficial di e festival e aña aki, e representante di ATA, Mark Benson Denz a confirma cu e festival di aña pasa a atrae mas di 3.000 bishitante di afo. "Esaki a surpasa e meta cu a wordo poni entre partidonan" Denz a bisa. NoticiaCla.com a compronde cu e meta ta pa por lo menos 2.500 turista mester por bin pa e evento. "E ta un punto sigur sumamente positivo" Denz a sigui bisa. Feedback di hotel tambe tabata hopi positivo segun Denz. 

AUMENTA SOSTEN

Considera como e patrocinante mas grandi di e evento, ATA a dicidi como tal pa e aña aki duna e sosten na e evento, y aumenta e suma di placa cu a duna e aña anterior. Lo sigui evalua esaki tur aña no obstante e hecho cu tin contractnan pa un duracion largo, y basa riba e raportnan cu ta sali despues di cada festival, ta determina si ta sigui inverti den e festival. "Obviamente nos kier yena Aruba durante e fin di siman ey, pero tur cos, e lunanan prome y despues, Aruba ta wordo hopi menciona den e diferente mercadonan".  Esey ta pa medio di prensa cu ta bishita Aruba. 

OTRO MERCADO

Segun Denz, a presenta listanan di prensa caba cu lo ta presente, fuera di esnan comun di e.o. Colombia, Venezuela, e biaha aki tin prensa di Brazil, Argentina, y tambe mercadonan nobo manera Chile y Peru (cu por cierto awor no mester di visa mas pa entrada). Tur oficina di ATA mundialmente ta bendiendo carchi pa e concierto. Entre nan a haci mencion di e mercado di Merca (sur di Florida) cu tin interes pa e cantante Enrique Iglesias. Un total di 20 pais a bishita Aruba pa e festival di aña pasa y kier surpasa esaki e aña aki.