Ainda no a identifica homber morto tras di ex Nanki Club

ORANJESTAD - Ainda no a logra identifica e curpa di e homber haya patras di ex Nanki Club na Seroe Colorado. Awe mainta vocero suplente di polis Liliana Rasmijn a splica cu ta wak si famia of otronan bin reclama e curpa. Mirando cu no a haya ningun forma di identificacion riba e persona, no por identifica esaki. "E persona ta parce un latino" Rasmijn a bisa. Tambe e vocero suplente ta bisa cu tin indicacion cu por ta trata di un caso di un persona cu a purba subi tera ilegalmente, pero cu a hoga den su intento. Pues e persona su identidad ta keda desconoci, un dia despues cu a hay'e riba tera. 

E CASO

Tabata dialuna despues di merdia ora cu Central di Polis a haya un melding di un persona cu no ta duna señal di bida patras di ex Nanki Country Club. Turistanan cu tabata eytras a ripara e curpa, pa cual nan a informa campistanan eybanda cu na nan turno a notifica polis. Unico cos cu a logra establece ta cu ta trata di un persona masculino, y cu tin un 'apariencia' latino. Pa 2:45 pm Dr Every a constata morto di e persona.