Fila di tankero na Venezuela debi na problema na PDVSA

CARACAS  —  Mientras cu gobierno di Aruba ta en espera di e contesta di CITGO e siman aki ainda pa dicidi si ta drenta den un relacion petrolero pa compra di e refineria, e compania madre PDVSA su problemanan ta sigui escala. For di e agencia britanico Argus, tin informacion e fin di siman aki cu e compania petrolero estatal Venezolano PDVSA su terminalnan maritimo na y rond di Venezuela ta experenciando mas congestionamento di tankeronan, y tempo di entrega (di petrolio) mas largo cu normal. No ta conoci si e situacion actual di PDVSA lo afecta esun di CITGO. Loke NoticiaCla.com a compronde, ta cu e situacion actual na PDVSA no ta faborece e situacion pa Aruba, mirando cu e por stroba e operacion si e deal mes keda cera. 

PROBLEMA CU INFRASTRUCTURA

Esaki pasobra problemanan consistente di e infrastructura cu tin cu maneha crudo y e productonan. Nan ta papia di por lo menos 40 tankero cu ta para na rij na terminalnan Venezolano na Jose, Amuay, Punta Cardón y El Palito. Te hasta pafo di Aruba, Boneiro y na altura di Bullenbaai na Corsou. Un agencia di bapor Venezolano a 'basha bou' cerca e agencia Britanico, pasobra di otro forma e informacion no ta sali.  

INTERUPCION OPERATIVO

E interupcion operativo di mas proporcion ta na e terminal Jose di 1.5 miyon bari pa dia na Anzoátegui, unda cu riba 60% di e exportacion di crudo di PDVSA ta sali. Oficialnan na Jose ta bisa cu nan ta operando 'bou di 40% di capacidad' pasobra tin hopi 'brasa operacional' daña'. PDVSA ta desmenti tur esaki, y ta sigura cu tur terminal di exportacion rond di Caribe di cual PDVSA ta sea huur of ta doño na Bonaire, Corsou y Aruba ta operando 'normal'. 

PROBLEMA CU CASH Y CREDITO

Di otro banda, e aumento den volumen di crudo liviano y productonan importa manera 'naptha' cu ta wordo uza pa diluente pa e crudo extra pisa di Orinico, ta prolongando e tempo pa entrega di producto na Jose, y tin un efecto negativo riba e operacion di e terminalnan di Corsou y Bonaire, cu ta wordo uza como wardado. Problema di pago tambe ta un factor serio cu ta congestiona e proceso di tankero na e terminalnan di PDVSA. Companianan cu kier haci negoshi cu PDVSA, ta pidiendo placa cash prome cu haci negoshi, y ta piendo carta di credito como forma alternativo di pago, cu ta refleha un problema di fluho di placa cash y di credito. 

PROBLEMA PA ARUBA

Un di e interesnan di CITGO ta netamente pa soluciona e problema aki, door di produci e producto intermediario di naptha na Aruba mes, pa despues sigui exporta esaki pa otro refineria pa por conclui e producto final. Pero si tin problema na Venezuela pa atende e tankeronan awor, e por dificulta esaki tambe. NoticiaCla.com a compronde cu e negociacionnan tin cu produci algo concreto e siman aki ainda, pero gobierno no ta bisando nada ainda, contrario na lunanan anterior ora cu prome cu e fecha mes, tabata bin dilanti cu informacion. E deadline pa e deal keda seya, ta 31 di maart proximo, esta diahuebs.