Investigacion ta sigui riba morto repentino di 'juffrouw Cici' Semeler

ORANJESTAD - E morto repentino di e dama Cicilien Semerel (23) a shock famia y conocirnan pero tambe esnan cu tabata traha cu ne, specialmente na e kinderopvang 'Tiponi'. Tabata diadomingo marduga cu docter Mungra a constata morto di e dama, despues cu a hay'e riba cama sin cu e ta duna señal di bida. Segun informacion oficial di vocero suplente di polis Lililana Rasmijn, Semerel lo a bira malo riba cual su guy mesora a jama 911 pa asistencia. Aunke cu ambulance y polis a yega mesora y trata na re anima e persona, esaki no a duna resultado positivo. No a keda nada otro pa constata morto oficial. Informacion circulando cu e lo tabata bou di influencia di sea alcohol of otro substancia, no ta berdad segun Rasmijn. "E no tabata bou di influencia di nada. E tabata un mucha muher trankil" Rasmijn a sigui bisa. Oficialmente investigacion ta sigui riba e caso di su morto. 

KINDEROPVANG TIPONI

Mientrastanto un di e lugarnan unda cu Semerel tabata traha, Tiponi Kinderopvang, a reacciona riba nan pagina di facebook. Semerel tabata studiando pa bira un maestro di scol, y tabata labora tambe na e Kinderopvang. Cariñosamente jama Juffrouw Cici, ta parce cu e tabata un persona hopi stima eynan. Riba e pagina di facebook di e scol, a splica cu ' juffr. Cici tabata un pionero di nos stichting, un juffrouw cu di inicio di nos Stichting a traha cerca nos. Un persona sumamente talentoso, dedica, ehemplar semper respetuoso.' Ademas a mustra cu su muchanan semper tabata su prioridad pa nan haya e bon guia necesario tanto riba nan tareanan di scol como personal. 'Cici ta un Juffrouw cu ta dificil pa ser lubida su sonrisa unico' tabata wordo bisa di dje. " Nunca e conoce e palabra No, aunque cuanto biaha nos ta bis'e 'Juffrouw Cici ta ora di bai cas. E ta contesta: "falta un tiki mas".  E no ta stop te ora e caba cu locual ela cuminsa cu ne." Pues por nota cu e tabata hopi stima. NoticiaCla.com ta extende palabranan di condolencia na famia di Cici.