Hues a disolve contract director Parke Arikok 'per direct'

ORANJESTAD - Entrante 24 di maart Emil ter Horst ta ex-director di Parke Arikok. Asina hues a dicta dia 24 di maart ultimo. Contrario na palabracion anterior cu ta dia 13 di april lo a duna veredicto, hues a 'adelanta' esaki. Den e sentencia hues a dicta cu e 'ontbinding' ta drenta na vigor 'per direct'. Ademas, hues a determina cu mirando e circumstancia y loke a wordo treci dilanti, ter Horst no ta haya compensacion financiero manera cu el a solicita. Y finalmente, hues a determina cu ter Horst tabata responsabel pa e problemanan y cu e no a tene su mes na e 'plan di accion' manera conveni ya cu ter Horst lo tabata contradeci esaki. 

SENTENCIA POSPONI

Tabata comienso di luna pasa cu hues a opta pa pospone e sentencia di e caso di Parke Arikok contra su director te april. Esey ta nifica cu e incertidumbre ta keda por lo menos un luna mas. Durante e periodo aki, e director no tabata permiti pa bay trabou, mirando cu apenas un siman pasa a ponele riba ‘non actief’. 

NON ACTIEF

Director di Parke Arikok a wordo poni op ‘non actief per direct’ algun siman pasa tardi. “Mi a ricibi un mail bisando cu mi ta riba non-actief, cu e motibo cu mi ta ‘hits op’ e personal. Por lo menos esey tabata un di e motibonan duna den e mail. Jammer” Emil Ter Horst a splica NoticiaCla.com e tempo ey. E no ta compronde e accion aki, mirando cu falta apenas un siman pa huez dicta sentencia den caso di desolvimento di su contracto.

DISPUTA ENTRE DIRECTOR Y DOÑO DI TRABOU

Manera ta conoci, tin un disputa formal laboral entre e director y su dunador di trabou pa cual algun siman pasa a cuminsa un caso sumario pa retira e director. E veredicto ey tabata programa pa 1 di maart . E director no tabatin pensa di bringa e punto ‘nobo’ aki pasobra no tin sentido pa haci tal. Segun ter Horst, si e lanta un caso awor, hues lo bis ‘e cu ta otro siman caba tin un veredicto, pues esaki no tin sentido. E lo papia si cu e directie diamars pa wak kico por saca afor di e motibo aki. Ademas ter Horst a confirma cu e tin gana di keda, y lo purba tur cos pa keda traha cu e parke, sea ta como director of un otro posicion, pasobra e ta gusta e trabou.

SORPRENDI CU E DECISION

Tabata pa 3:30 pm e tempo ey atardi cu e director a ricibi su mail, cu e ta riba non actief. E ta lamenta esaki pasobra e siman aki ainda nan tabata trahando riba e raportahe di aña, tambe preparando un expo cu ta cuminsa e fin di siman aki y un anochi di cine Colombiano. “Mi no ta compronde con den un solo biaha esaki mester a sosode” ter Horst a bisa. Segun e director, hues a bisa for di biaha pasa caba cu no por a retira e directiva. Pues no ta compronde e parti. Tin un otro caso tambe pendiente cu e mes a entama contra su dunador di trabou, pero esey ta conociendo algun contratiempo.

MOTIBO DI NON ACTIEF

E motibo duna pa e op non actief stellen, no ta cuadra segun ter Horst, pasobra e directiva mes ta bezig ta ‘hits op’ e personal, papiando solamente cu esnan cu no a firma e carta cu tabata pro e director algun tempo pasa. “Tin poco sinti pa bisa esaki si. Mi ta echt spera cu e cos aki tuma un rumbo diferente. Ta pica, pasobra parke ta 20% di e isla” e director a bisa. 

REACCION DIRECTIVA PARKE ARIKOK

For di directiva di Parke Arikok, NoticiaCla.com a haya e siguiente reaccion di Greg Peterson. "Lamentablemente e falta di confiansa cu e directiva tin den e director, a deteriora mas aun, lagando e directiva cu ningun otro alternativa". Pues segun Peterson, no a keda e directiva nada otro cu pone e director riba non actief debi na su comportacion cu lo a 'deteriora' mas ainda. Lesa e sentencia aki.