Implementacion di beach policy na Aruba ta cuminsa diabierna awor

ORANJESTAD - Entrante prome di april 2016 por haci peticion na Directie Infrastructuur y Planning (DIP) pa permiso di espacio riba beach. Esaki oficina di ministerio di turismo a informa e siman aki.  Segun un comunicado emiti, regulacion riba nos beachnan ta di suma importancia pa nos mantene producto Aruba di un nivel halto. Cu implementacion di e maneho di costa, of Beach Policy, lo percura pa no solamente nos bishitantenan disfruta di un miho forma di nos beachnan, pero e lo percura pa preservanan tambe pa nos propio futuro generacionnan.  

HACI PETICION NA DIP

Fase di implementacion ta cuminsa. Entrante 1 di april 2016, tur cu ta interesa pa haci uzo di un espacio riba nos beachnan cu e proposito di negoshi por haci nan peticion oficial na DIP (Departamento di Infrastructura y Planificacion). Permiso pa un espacio riba beach entre ex-Bushiri Hotel te cu Fishermanshut conforme e liña di maneho nobo di e “Richtlijn Ruimtelijke Inrichting Stranden”, “Strandenbeleid”, miho conoci como Beach Policy, mester haci peticion na oficina di DIP durante luna di april 2016. Ta urgi pa tuma bon nota di esaki. Por haci e peticion pa uzo di espacio riba beach na e balie di DIP durante dianan di oficina, entre 7:45-11:45 di mainta y 1:15-3:45 di atardi. 

KICO TA NECESARIO?

Ora di haci e peticion ta rekeri di e peticionario pa e entrega:

-comprobante di inscripcion na Camara di Comercio, 

-comprobante di persoonsnummer di Servicio di Impuesto, 

-copia di identificacion valido, 

-un situatietekening di kadaster  

-31 florin.

PERIODO DI EVALUACION 

Durante luna di mei 2016 lo evalua tur peticion pa por contesta tur peticionario. Evaluacion di e peticionnan haci lo sosode den luz di e “Strandenbeleid” manera aproba, di palabracionnan haci cu esnan envolvi cu e “Strandenbeleid” y informacion duna den pasado. Den e evaluacion di peticionnan pa uzo di tereno “Directie Scheepvaart”, “Strandpolitie”, “Maritiem Politie” y “Dienst Openbare Werken” (DOW) lo wordo consulta. E peticionnan cu por wordo honra lo keda formalisa cu un permiso pa un espacio destina riba beach y cu un validez di 6 luna. Meta ta pa por otorga permisonan pa uzo di espacio riba beach entrante 1 di juli 2016. Conforme palabracionnan haci, peticion di esnan cu tabata haci uzo di espacio riba beach na 2009 lo wordo tuma den consideracion prome. Peticionarionan cu a ubica nan mes riba beach despues di e control di 2009 sin tin precario y otro permisonan necesario lo no por wordo concedi un permiso pa uzo di beach si no tin mas espacio conforme e liña di maneho. Na november di 2016 mester haci peticion pa renobacion. Na januari 2017 permisonan di usuarionan cu a cumpli cabalmente cu condicionnan stipula den e permiso y cu tabatin un comportacion manera cu autoridad y cu den e Beach Policy ta stipula pa mantencion di orden publico y siguridad riba awa, lo por wordo otorga pa henter aña.