Ministerio Publico cu orden di aresto pa sospechosonan di atraco di catochi

ORANJESTAD - For di den fin di siman polis ta buscando identidad di e atracadornan riba oficina di catochi na Piedra Plat. Ministerio Publico a duna ordo di detencion pa dos sospechoso acusa di tabata envolvi den un caso di atraco arma diahuebs ultimo alrededor di 8:24 na Piedra Plat Lottery. Eynan dos homber arma a drenta y bou menasa cu arma a logra bay cu alrededor di Afl. 1100,= di e benta di e atardi. Ambos a subi un auto cu glas getint.

APELACION NA COMUNIDAD

Te na e momento aki Polis no tin informacion di e nomber of adres di e sospechosonan, pa cual ta haci un apelacion na comunidad, basa riba e imagennan capta den e camara di siguridad di e oficina di number, pa yuda identifica e sospechosonan. Husticia ta considera nan peligroso y nan por ta arma, pa cual nan detencion rapido ta necesario.

ORDEN DI DETENCION

Fiscal a duna ordo pa detene nan mesora, basa riba sospecho di lo a comete varios delito cu ta castigabel pa ley, segun nos Codigo Penal. Ta urgi comunidad pa yama Polis mesora, den caso cu tin mas informacion. Tambe por haci uzo di e number 11141 pa laga informacion atras den forma anonimo.