Peterson: DIP ta actua den conflicto cu deseo di Parlamento riba tereno rosa na Bubaliplas

ORANJESTAD - Despues di a tuma nota di e reaccion di Departamento di Infrastructura y Planificacion (DIP) riba e asunto di tereno rosa dilanti Phoenix Divi Hotel, e presidente di e organisacion no gubernamental cu a protesta inicialmente, esta Greg Peterson di Aruba Birdlife Conservation (ABC) a mustra su desaprobacion. "Desaprobacion total cu DIP", Peterson a bisa riba su pagina di facebook. Y mes momento e ta referi na e votacion unanime di parlamento cu a vota cu 21 voto pa haci e area ey tambe un parti di Parke Arikok. "DIP ta actua den conflicto cu e deseo di Parlamento", Peterson a bisa.

DIP

E tereno grandi cu a keda rosa recientemente no ta un tereno 'berde' manera cierto instancianan ta pretende of informa. Asina miembro di management team di Directie Infrastructuur & Planning (DIP) Isabel Dammers a bisa NoticiaCla.com siman pasa. "E tereno ta na rand (di e groen gebied), pero no den dje" Dammers a sigura e portal aki. Tur cos a sosode legal y ta trata di un proyecto cu ta data di dos pida tereno otorga na 2009, cu hunto ta midi 32.219 m2, cu inicialmente a wordo parti den dos. Awe nan ta hunto pa un proyecto hotelero estilo condominio (y voorziening). NoticiaCla.com a compronde di fuentenan cerca di e proyecto, cu ta trata di un proyecto cu a pasa di tata pa yiunan. 

HISTORIA DI TERENO

Segun Dammers, tabata na 2009 cu e desaroyador inicial, a haya un tereno otorga erfpacht di 14.075m2, cu un opcion pa e tereno banda di dje, pero cu lo a bay 'riba reserva' pa un periodo di 2 aña. Nan lo a haya e prome tereno y despues e di dos den e proximo fase pa por 'amplia' e proyecto hotelero despues. Dos aña a pasa sinembargo ora cu a dicidi di 'claim' tur e dos terenonan. A cuminsa un 'bai bin' entre e desaroyadornan y gobierno, unda cu finalmente a opta pa duna e di dos tereno tambe, condiciona conforme na regla. Aki a cera e combenio aña pasa april 2015, pa despues firma e acta notarial na september di e mesun aña. Segun informacion di fuentenan cerca di e proyecto, e desaroyadornan a keda cla aña pasa cu e parti di financiamento, y finalmente awor nan por a cuminsa cu e proyecto mes, pa cual a rosa esaki.