Pa diahuebs mester sa si CITGO ta dicidi pa cumpra e refineria

ORANJESTAD - Aki tres dia e deadline pa e definite agreement entre CITGO y gobierno mester ta firma pa tin un confirmacion cu enberdad e refineria por conoce un cumprado nobo. Pero indicacion ta cu e fecha ey lo no ta alcansabel, aunke cu esey no ta nifica cu 'e deal ta off'. Informacion cu NoticiaCla.com tin, ta mustra cu partidonan ta trahando duro pa por logra e deadline, pero cu ta mustra cu nan lo mester di mas tempo pa por keda cla cu e 'acuerdo final'. Tambe tin informacion cu por tin chens cu lo pidi pa un 'extension' di ultimatum pa partidonan por keda cla si, aunke despues di e fecha menciona. Contrario na e dos fechanan anterior, e biaha aki si CITGO no a informa gobierno 'prome cu tempo' di nan desicionan, y esey tin hopi hende preocupa y nervioso. Preocupa pasobra esey ta laga hende den incertidumbre y nervioso pasobra e por nifica cu e deal no ta sigui, cu por ta un problema pa gobierno.

GOBIERNO CAUTELOSO

Siman pasa e mandatario cu cartera di energia Mike de Meza tabata hopi cauteloso, informando cu partidonan ta 'positivo' y cu 'nanishinan ta den mesun direccion'. Di otro banda no por a garantisa cu pa 31 di maart e acuerdo final por keda cla. Tambe a compronde di parti di CITGO cu nan lo a puntra kico lo pasa si pa e fecha ey nan no keda cla pa duna e desicion final. Riba esey, NoticiaCla.com a compronde cu e intencion ta cu pa e fecha ey lo pone tur cos riba papel y determina kico tur a wordo haci te cu awor, unda ta y kico falta. Despues di esey, lo determina e siguiente plan. Pues e proximo dianan ta bira uno sigur hopi crucial pa e reapertura di e refineria of no. 

DESAROYONAN PARALELO 

Mientrastanto paralelo cu esaki, gobierno a anuncia cu e edificio cu antes tabatin DOOV aden na San Nicolas, lo fungi temporalmente como e CITGO helpdesk unda cu por solicita pa trabou pa e compania. Mes momento politicamente fraccion di MEP pa medio di nan parlamentario Glenbert Croes, a informa cu nan ta alerta gobierno pa no tranca y tarda e apertura aki, pasobra cu si esey sosode y e deal no sigui, e loke cu a experiencia den parlamento ora di aproba ley di CAFT, e biaha aki e situacion lo ta pio. Kico esey ta nifica exactamente, no a bisa.