Buleria di Aruba a luci na Palmundo y Carlos Vives y Gilberto Santa Rosa a cancela

ROTTERDAM - Mientras cu tabatin discusion riba e motibo di cancelacion di dos nombernan grandi pa e festival di 'Palmundo' na Ahoy diasabra ultimo na Rotterdam Hulanda, un nomber cu si no a cancela, tabata e banda di Aruba, Buleria cu pa un ora largo a representa Aruba riba un escenario dilanti miles di persona. Entre esnan cu a presenta cu Buleria tabata Jeon cu a deleita esnan presente cu 'Dushi Bida'. Otro artista presente cu Buleria tabata Dongo, cu tin un remix cu Ron den UnfinishBizz, cu e version di 'Laga nan yamabo cayente'. Segun nan representante Jairo Evertz a splica NoticiaCla.com, Buleria su presentacion a bay sublime, sin problema y a duna nan un otro experiencia grandi internacional. 

CANCELACION 

For di diabierna rumornan a cuminsa circula di cancelacion di presentacion di nombernan grandi manera Gilberto Santa Rosa y Carlos Vives. Mientras cu ambos riba nan respectivo portal a pone e fayo den man di e organisadornan pa 'incumplimento di contracto', e organisadornan despues a mustra cu esey no ta necesariamente e motibo. Esnan cu si a presenta tabata entre otro Prince Royce, Don Omar y Gente de Zona. Pa otro aña a compronde cu Aruba lo tin representacion di Robert & Su Solo Banda Show, mientras cu e aña despues, Claudius Phillips cu Oreo.