Rolling Stones den concierto historico na Cuba diabierna

HAVANA - Un total di casi mey miyon Cubano y otro fanaticonan di Rolling Stones a gosa e concierto gratis di e grupo legendario Rolling Stones diabierna anochi den capital di Havana. Danki na e filantropo di Corsou Gregory Elias, e grupo aki por a presenta pa prome biaha na e pais comunista, completamente gratis. Rolling Stones a contribui di nan parti pa asina e concierto tabata pornada. Elias su fundacion Bon Intencion a cubri e produccion completo, y Rolling Stones no a cobra pa e presentacion. Un regalo di Corsou pa contribui na e cambionan cu Cuba ta pasando aden. 

PAPA FRANCISCO Y REPERTORIO 

Prome cu e concierto, un carta di vaticano di Papa Francisco a pidi e grupo pa no presenta riba Diabierna Santo, y posiblemente warda te despues di mey anochi. Algo cu no por a tuma lugar. Esey no a kita cu e concierto tabata menos bon. Un repertorio completo y un presentacion di 2 ora largo a pone miles di persona biba un momento historico nunca bisto. Antes e cancionnan por a wordo scucha den secrecia di e casnan Cubano. Awe esey no ta necesario mas. 

MOMENTO BUNITA Y HISTORICO

E banda mes a yega un dia prome, y tabata hopi entusiasma cu e presentacion. Mick Jagger, Keith Richards, Rond Wood y Charlie Watts a toca nan repertorio unda cu cancionnan manera Start Me Up, Angie y Satisfaction a clausura e evento magno aki. E ta un muestra cu edad no ta un problema mirando cu Jagger mes tin 72 aña y su coleganan di banda no ta mucho leu. Jagger durante e concierto varios momento a comunica cu e publico na spaño, hayando asina reaccion spontaneo di e publico.