E pakico 'Riviera' no a mara na Aruba pero si na Bonaire

ORANJESTAD - " Ta tur pais nan mes un responsabilidad dentro di e margen di International Health Regulations (IHR)". Asina e miembro di management team di Departamento di Salud (DESPA) Jerry Staring a bisa NoticiaCla.com diabierna como e motibo pakico Aruba no a laga e bapor crucero Riviera mara na Aruba, mientras cu na Bonaire si e por a mara. Esaki a crea hopi pregunta, y como tal a bay busca e motibo mas specifico riba e diferencia entre e dos islanan aki. 

NO POR HANDLE E CANTIDAD DI HENDE MALO

Segun Staring, " Nos sa cu nos no por handle e cantidad di hende malo ni monitoring ni na hospital". E ta sigui mustra cu mirando e cantidad di hende cu edad relativamente halto (average 71 aña di edad), e por ta un riesgo mas grandi. "Nos no ta confia e cifranan tampoco. Segun nos, mester tin hopi mas hende malo mirando e tipo di virus y e progreso di e outbreak basa riba un asercamento epidemiologico. Pues como tal no no kier tuma e riesgo cu ora e hende aki baha, (pa) nan pega otro hende sea local of turista", Staring a sigui bisa. 

VIRUS HOPI CONTAGIOSO

E miembro di e management team di DESPA  ta mustra cu e virus noro ta hopi contagiable y pues ta plama hopi liher. Den caso di Bonaire, nan si a tuma nan, pero cu restriccion. Manera cu NoticiaCla.com a raporta caba, nan a restringi pasaheronan malo y nan no por a baha. " Pero nos ta di opinion cu no tin bon bista ken ta malo y ken no. Tambe mirando e antecedente di e bapor aki, e no ta mustra bon" Staring a bisa. " Nos ta papiando di 5 outbreaks den 1 aña, di cual e ultimo tabata na februari ultimo, esta un luna pasa ainda. " Nos no ta kere e restrictions (cu Bonaire a impone) ta bay proteha nos poblacion suficiente ya cu bo ta papiando tambe di un periodo di incubacion cu por ta di un par di ora te na un par di dia ". Segun Staring, Bonaire si tabata dispuesto di tuma e riesgo ey. " Nan mag tuma e decision dentro di e margen di International Health Regulation. Nos na Aruba a sigui e consehonan di Center for Disease Control (CDC) " Staring a finalisa bisando. FOTO principal ta di Riviera mara awe mainta na waf di Bonaire, cortesia Bob Harms.