Bapor cu a wordo nenga na Aruba si a mara na Bonaire

KRALENDIJK - Un dia despues cu e bapor crucero Ms Riviera a wordo nenga entrada na Aruba pa motibo di virus abordo, e mesun bapor crucero a mara na waf di Bonaire si. Gobierno di e isla di flamingo a sigura cu a tuma tur paso di precaucion y a alerta e comunidad cu tur hende cu kier bishita e bapor, ta alerta. Segun e informacion, contrario na e situacion na Aruba, 'algun pasahero ta infecta cu un virus cu ta causa sacamento y of diarea'. Ta trata di e virus noro of norwalk. Relaciona cu e caso aki, gezaghebber di e isla Edison Rijna a manda un carta pa e capitan pa inform'e di e condicionan pa por mara na Bonaire. (lesa e carta aki)

PASAHERONAN POR BAHA

E forma con Bonaire ta maneha e situacion ta, cu solamente pasaheronan cu no tin keho di virus por baha di e bapor na Bonaire. Pasaheronan cu tin e virus y of cu tabatin contacto cu personanan cu tin e virus no por baha. Esnan cu si por baha, a haya instruccion riba higiena di man, y kico di haci den caso di 'tosamento'. Nan mester disinfecta nan mannan prome cu nan baha di e bapor. En caso cu tin pasahero cu mester di atencion medico, nan lo wordo transporta pa hospital. Relaciona cu esey, instancianan concerni a wordo alerta caba. 

ISOLA

Mientrastanto pasaheronan infecta a wordo isola di e resto di pasaheronan pa evita mas contaminacion. Gezaghebber Edison Reina a ricibi informacion cu e cantidad di pasahero afecta, a keda reduci drasticamente. Rijna a comunica na NoticiaCla.com awe mainta cu lo relata na fin di dia, con a bay cu e proceso di e pasaheronan. 

SITUACION NA ARUBA

Na Aruba e situacion tabata hopi mas diferente. Diahuebs Santo Gobierno di Aruba a rechasa entrada di e bapor crucero Riviera di e compania Royal Caribbean Cruise Ltd. E motibo di e decision aki ta debi na varios aspecto, cu tin di haber cu salud publico.

NOTIFICACION DI HENDE MALO

Diaranson a informa Departamento di Salud Publico di Aruba cu tin 44 pasahero abordo cu ta malo, sospecha di ta sufri di "Gastroenteritis". Den menos di 24 ora e cantidad aki a aumenta te cu 56 pasahero, incluyendo 1 miembro di tripulacion. Cu esaki ta mustra cu tin un "outbreak" abordo y cu a hasta afecta e miembronan di tripulacion.

CANTIDAD DI HENDE MALO A AUMENTA 

Pa awe ora cu e barco tabata yegando nos isla, ya e cantidad di pasaheronan infecta a subi na 64 caso! Ta tene cuenta cu tin un problema structural riba e mesun crucero aki, pasobra esaki ta di 5 "outbreak" riba e crucero aki den e ultimo aña. E ultimo tabata luna pasa ainda den cual 127 hende a bira malo, di cual 124 pasahero y 3 tripulante. 

EDAD HALTO DI PASAHERONAN

E informacion cu a yega na Departamento di Salud Publico ta indica cu e edad promedio di e pasaheronan abordo ta 71 aña, hincando e pashentnan den un grupo di riesgo debi na nan edad y condicion. E pasaheronan infecta ta experenciando 20 episodio di diarea den 24 ora di tempo, cu riba su mes ta causa deshidratacion. 

NO POR MONITOR TANTO PASHENT ASINA

Cu e realidad aki riba mesa, Departamento di Salud Publico a atende e reto aki tanto cu Minister di Salud Publico como tambe cu Minister Presidente di nos pais, splicando cu na Aruba nos no tin e capacidad humano pa monitor tanto pashent malo pareu asina. Tambe ta tene cuenta cu nos Hospital no tin e capacidad pa atende e cantidad di pashentnan deshidrata. 

NORWALK VIRUS

Te ainda no ta confirma kico ta e enfermedad cu e pasaheronan ta infecta cu ne, pero ta haciendo testnan cu ta mustra cu lo por ta "Norwalk Virus". Cu tur e retonan ey y cu e realidad di e situacion di salud cu Aruba por carga na e momento aki, y di acuerdo cu areglonan internacional, a dicidi di nenga entrada di e crucero aki y conseha nan pa regresa Miami pa eynan atende e pasaheronan y sanea e barco tambe.