Maduro: 'Ralph Maduro ta doño di Power 101.7 FM y no minister Otmar Oduber

ORANJESTAD - Minister Otmar Oduber no ta doño of propietario di e emisora di Piedra Plat, Power FM cu su frecuencia 101.7. Asina e propietario di e emisora Ralph Maduro a bisa den e noticiero 'noticiacla-merdia', riba e emisora en cuestion. Diahuebs merdia, Maduro a presenta documentonan relevante manera e extracto di Camara di Comercio cu ta mustra cu e ta e unico doño di e emisora, y no Oduber. Segun Maduro, berdad cu Oduber ta hopi liga cu ne y nan ta considera otro te hasta 'ruman'. A base di esey, politiconan opositor ta uza e amistad aki pa fomenta cos cu no ta segun Maduro. Y ora cu e periodista Nelson "Speed" Andrade a tilda e mandatario di Turismo di ta doño di e emisora, Maduro a haya cu ta basta y a bin dilanti pa demonstra lo contrario. "Mi sa cu e mandatario lo demanda Speed pa difamacion (riba e tema ey). Si e no haci'e, ami si lo hibe corte" Maduro a sigura NoticiaCla.com. De hecho, a sigura cu ya diahuebs mainta a papia cu su abogadonan pa un cu otro. 

CLARIFICACION DOÑO DI RADIO

Maduro cu tabata na Hulanda enberdad pa e.o. Arubadag, tabata planea pa extende su estadia pa por presencia e concierto di Pal Mundo e fin di siman aki. Pero ora cu a bin e acusacionan na Aruba riba dje y e mandatario, mesora el a opta pa kibra su biahe y bolbe Aruba mesora pa refuta tur loke a wordo bisa contra dje. Riba e documentonan presenta, ta mustra cu e emisora operando comercialmente como Power FM 101.7 tin un NV bou di nomber Bring Broadcasting Entertainment NV, riba cual e unico nomber cu ta aparece, ta di Maduro. E hecho cu ta yama e emisora hopi biaha 'e radio di Otmar', ta netamente pasobra segun Maduro, politica partidista kier spin e den e direccion ey. Maduro a bisa tambe cu nunca antes e no a bin dilanti y a keda leu di e tipo di asuntonan ey, pero awor tabata basta. "Comunidad no ta kens. Nos radio ta uno mas neutral cu otronan. Mi a traha duro pa hiba un maneho balansa y neutral, hunto cu Ruben Garcia (e director di e radio). Segun Maduro, no ta uza e radio pa fin politico y tur hende ta haya chens igual. De hecho a mustra tambe cu ta un contract so tin cu un departamento di gobierno, y esey ta cu departamento di Santa Rosa. Nada mas. 

KEN A HIBA KEN ARUBADAG NA HULANDA

Pa loke ta acusacion cu a hiba henter e personal di e radio pa Arubadag tambe Maduro a refuta mesora. Segun e propietario, a paga solamente pa un persona di e emisora ,-locutor y tecnico Ivan Kelie Jr-,  y tur otro cu a bay a bay riba propio gasto. Maduro a bisa di ta dispuesto pa mustra tur documento pa prueba esey. E ta sigura cu el a bay riba su propio gasto, y cu Ruben Garcia a wordo invita pa gobierno di Aruba pa ta e MC di e evento na Hulanda. Algo cu e la bin ta haci pa hopi aña. Kelie di su banda ta un bon conoci pa e eventonan ey ya cu pa mas di 15 aña e la sa di cubri e evento ey den diferente faceta. Pa loke ta e locutura popular Julie Margarita, el a percura pa su sponsornan cubri su biahe pa e evento, y a combina esey cu un vacacion personal. Pues segun Maduro, e declaracion cu a paga pa practicamente henter e personal bay Arubadag, tambe ta incorecto y infunda. E ta lamenta cu a asocia e y demas miembronan di e emisora como 'chupacabra' y hinca nan den e 'mesun boto' cu otronan, siendo cu ta facil pa prueba lo contrario. Maduro a duna indicacion cu 'lo ta bon pa Arubahuis' bin dilanti y mustra di nan parti kico realmente e situacion ta. "Por a facilmente pidi pa info, pero a opta pa no hac'e" Maduro a bisa di e periodista Andrade. "E funcion di periodista a ked'e (Andrade:red ) grandi", Maduro a bisa, indicando cu e periodista mester a haci un miho trabou en bes di lansa calumnia den aire sin verifica prome.