Oduber: No a prohibi Speed entrada na conferencia of pa kita aviso

ORANJESTAD - 'Absolutamente cu no. Na ningun momento y atrobe si esaki a tuma lugar mi ta spera cu esnan cu ta bisando esaki por presenta e pruebanan necesario'. Esey tabata minister Otmar Oduber diahuebs anochi na NoticiaCla.com riba comentarionan cu ta coriendo rond relaciona cu e desenlace di e conferencia di prensa di diaranson pa refuta acusacionan haci pa periodista Nelson 'Speed' Andrade. 

KITA AVISO OF PROHIBI ENTRADA NA CONFERENCIANAN?

Despues di e conferencia tabatin comentario cu e mandatario lo a prohibi entrada na e periodista na futuro conferencia y of evento di e mandatario of di Aruba Tourism Authority. Mes momento, e mandatario ta desmenti cu a duna ordo pa para aviso di su ministerio y of ATA na e matutino Diario, a consecuencia di e desenlace di diaranson. "Absolutamente cu no. Tampoco. Mi ta kere cu esaki ta un atentado directo contra e libertad di prensa cu mester tin" Oduber a sigura NoticiaCla.com.  

RESPET PA TRABOU DI PRENSA

Segun Oduber, contrario na e declaracion di Andrade, cu e lo tin cu cobra algo pa por pone noticia di turismo riba su pagina, e mandatario no ta kere cu esey ta e forma cu periodismo tin cu funciona. "Mi tabata perschef di gobierno den pasado, vocero di gobierno. Mi tin respet pa e trabou di periodismo, y absolutamente mi lo por yega na e punto di prohibi ningun hende un entrada y menasa un organisacion cu mi lo no duna propaganda na dje of whatsoever" Oduber a sigui bisa.  E mandatario a sigui mustra cu si un medio di comunicacion enberdad ta uza su medio pa unicamente critica of destrui proyectonan di ken cu por ta, e ta kere cu ta keda na e cliente pa dicidi si e ta pone aviso na e medio ey. Loke e mandatario a admiti si, ta cu e la manda un carta pa dos doño di trabou di Andrade, exigiendo respet. Mira e carta aki.

CASO DEN CORTE SI TA SIGUI

Loke si e mandatario ta admiti  ta cu su intencion di demanda Andrade den corte, ta sigui vigente y cu diamars otro siman e lo tramita esaki tambe. Segun e mandatario, na un momento cu un persona ta purba insinua y cu su insinuacion ta purba haci daño na bo imagen creando como si fuera cu tin un beneficio ta wordo brinda of crea pa un emisora particular, den e caso aki Power FM, insinuando cu Oduber lo ta doño di esaki, e ta kere cu e periodista en cuestion (Nelson "Speed" Andrade) tin cu presenta e pruebanan necesario. E mandatario a mustra cu un carta a wordo manda pa Andrade pa rectifica esaki. Si dado caso e no por presenta e prueba, e tin cu rectifica. Dado caso prome cu esey Andrade acepta su fout, Oduber lo respeta e grandesa y lag'e te eynan.